Shoqata kërkon TVSH 6% për transportin publik dhe paralajmëron rritje biletash

Shoqata Kombëtare e Transportit Qytetas i ka kërkuar zyrtarisht qeverisë përfshirjen e transportit publik në skemën e TVSH-së së reduktuar prej 6%, duke paralajmëruar se nga 1 janari do të kërkohet rritja e çmimit të biletës dhe abonesë nëse propozimi nuk pranohet. Nga ky ndryshim pritet të preken rreth 500 mijë qytetarë që përdorin çdo ditë transportin publik në shkallë vendi.

Kjo kërkesë u është drejtuar nga shoqata Komisionit për Ekonominë, Punësimin dhe Financat, Ministrisë së Financave si dhe Ministrisë së Infrastrukturës në kuadër të procedurave parlamentare për shqyrtimin dhe miratimarjen e Projektbuxhetit të Shtetit dhe Paketës Fiskale për vitin 2027. Sipas paketës së re fiskale të prezantuar nga qeveria, propozohet rritja e normës standarde të TVSH-së nga 20% në 21%, ndërsa norma e reduktuar prej 6% është parashikuar të zbatohet vetëm për një listë prej 54 produktesh ushqimore. Shoqata e transportit kërkon mosmiratimin e kësaj rritjeje të normës standarde dhe përfshirjen e shërbimit të tyre te produktet dhe shërbimet bazë të shportës familjare.

Sipas Shoqatës Kombëtare të Transportit Qytetas, operatorët e licencuar përballen me kufizime ligjore pasi çmimi i shërbimit nuk mund të rritet në mënyrë të njëanshme sepse tarifat përcaktohen nga pushteti vendor. Shoqata sqaroi se kompanitë nuk mund ta përshtatin çmimin me kostot reale edhe kur përballen me rritje të çmimit të karburantit, energjisë, pagave, kontributeve të personelit, mirëmbajtjes, pjesëve të këmbimit, sigurimit të mjeteve, si dhe kostove për modernizimin e flotës dhe përmbushjen e orareve e frekuencave të miratuara.

Aktorët e sektorit vlerësojnë se vendosja e barrës së re fiskale pa një mekanizëm kompensimi apo lehtësimi rrezikon të thellojë rezultatin negativ financiar të kompanive, të reduktojë investimet dhe të cenojë vazhdimësinë e lëvizjes. Po ashtu, shoqata argumentoi se në disa vende të Bashkimit Europian dhe të Ballkanit Perëndimor aplikohet tashmë një TVSH e reduktuar për sektorin e transportit publik.

Shoqata nënevizoi se transporti publik mbetet një shërbim me interes të përgjithshëm që lidhet me lëvizjen e përditshme të qytetarëve, studentëve e pensionistëve drejt punësimit, arsimit dhe shëndetësisë. Për këtë arsye, grupi i operatorëve të transportit kërkon që politikat fiskale të marrin parasysh natyrën e veçantë të këtij sektori që funksionon mbi tarifa të rregulluara shtetërore.

“Operatorët nuk kanë të drejtën dhe as mundësinë të rrisin në mënyrë të njëanshme çmimin e biletës apo të abonimit, edhe në rastet kur përballen me: Rritje të çmimit të karburantit dhe energjisë. Rritje të pagave dhe kontributeve për personelin. Rritje të kostove të mirëmbajtjes, pjesëve të këmbimit dhe sigurimit të mjeteve. Shtim të detyrimeve fiskale dhe tatimore. Kosto për rinovimin dhe modernizimin e flotës. Detyrime për realizimin e kilometrave, frekuencave dhe orareve të miratuara të shërbimit.”