Mazhoranca propozon vinjetën për automjetet me targa të huaja

Një sistem i ri tarifimi për përdorimin e rrjetit rrugor kombëtar është parashikuar në projektligjin e depozituar në Kuvend nga socialistët, ku automjetet me targa të huaja që hyjnë në Shqipëri do të duhet të pajisen me vinjetë me vlefshmëri nga një ditë deri në një vit, ndërsa për mjetet e regjistruara në Shqipëri detyrimi do të përfshihet në taksën vjetore të mjeteve të përdorura.

Sipas nismës ligjore që ndryshon mënyrën e tarifimit për përdorimin e rrugëve kombëtare, e cila vjen vetëm pak ditë pasi qeveria vendosi të heqë taksën e qarkullimit nga çmimi i naftës dhe benzinës nga 1 janari 2027, bëhet fjalë për projektligjin «Për disa ndryshime dhe shtesa në ligjin nr. 8308, datë 18.3.1998, “Për transportet rrugore”», të propozuar nga deputeti i Partisë Socialiste, Andi Qose. Përmes këtij sistemi vinjete, automjetet do të paguajnë për përdorimin e infrastrukturës rrugore për një periudhë të caktuar, ku detyrimi i drejtpërdrejtë për blerjen e vinjetës në pikat kufitare apo përmes kanaleve elektronike do të jetë për automjetet e regjistruara jashtë Shqipërisë, kurse për ato me targa shqiptare pagesa do të integrohet në taksën vjetore të mjeteve të përdorura, siç bëjnë me dije burimet.

Sipas projektligjit, automjetet e regjistruara jashtë territorit të Republikës së Shqipërisë do të duhet të pajisen me vinjetë në momentin e hyrjes në vend, ku shitja do të kryhet nga shoqëria aksionare «Enti Kombëtar i Operimit Rrugor» (EKORR) në pikat e kalimit kufitar dhe nëpërmjet kanaleve elektronike, ndërsa pagesa do të mund të kryhet edhe paraprakisht përpara hyrjes në territorin shqiptar. Për automjetet e lehta, projektligji parashikon periudha vlefshmërie prej një dite, dhjetë ditësh, tridhjetë ditësh dhe një viti ose 365 ditësh, çka do të thotë se një turist apo shtetas i huaj nuk do të jetë i detyruar të paguajë tarifë vjetore por mund të zgjedhë periudhën e përdorimit të rrjetit rrugor. Projektligji përcakton kufijtë maksimalë të tarifave për automjetet e lehta të llogaritura në raport me tarifën vjetore, ku ajo nuk mund të kalojë 9% të tarifës vjetore për vinjetën ditore, 11% për vinjetën 7-ditore, 12% për vinjetën 10-ditore, 19% për vinjetën 30-ditore dhe 30% për vinjetën 60-ditore. Ndërkohë, vlera konkrete në lekë nuk është përcaktuar në projektligj dhe ajo do të miratohet më vonë me vendim të Këshillit të Ministrave së bashku me kategoritë e mjeteve dhe metodologjinë e llogaritjes, ndërsa për autobusët tarifa ditore nuk mund të kalojë 2% të tarifës vjetore, ajo javore 5% dhe tarifa mujore 10%.

Në relacion, propozuesit argumentojnë se kjo mënyrë shmang krijimin e një detyrimi të dytë administrativ për drejtuesit e automjeteve shqiptare, ndërsa nisma parashikon që automjetet të mos paguajnë dy herë për të njëjtin segment rrugor, duke përjashtuar nga rrjeti i vinjetës infrastrukturën rrugore me koncesion, urat, tunelet dhe rrugët malore për të cilat është vendosur një tarifë e veçantë përdorimi, ndërsa Këshilli i Ministrave mund të miratojë përjashtime ose reduktime tarifash për kategori të caktuara automjetesh si ato elektrike.