6 kantone zvicerane duan ta heqin frëngjishten nga shkollat fillore
Ministrja e Arsimit paralajmëron se zhvendosja e frëngjishtes mund të dëmtojë harmonizimin arsimor dhe kohezionin kombëtar.
BERN — Drejtoresha e Forumit për Dygjuhësi në Zvicër, Virginie Borel, ka kërkuar që shkollat të vazhdojnë t'u japin përparësi gjuhëve kombëtare, duke u kundërvënë përpjekjeve të disa kantoneve gjermanofolëse për ta shtyrë mësimin e frëngjishtes në shkollën e mesme.
Sipas Borel-it, mësimi i hershëm i gjuhëve kombëtare nuk lidhet vetëm me njohjen e një gjuhe tjetër, por edhe me kuptimin e kulturës dhe mënyrës së jetesës të komuniteteve të tjera në Zvicër. Ministrja e Arsimit, Elisabeth Baume-Schneider, ka paralajmëruar se një hap i tillë mund të dëmtojë harmonizimin e arsimit dhe kohezionin kombëtar.
Disa kantone si Cyrihu, Argovia, Turgovia, Shën Galleni, Appenzell Ausserrhoden dhe Shvici kanë mbështetur ndryshime që do ta kufizonin mësimin e frëngjishtes në nivelin fillor, ndërsa në kantone të tjera debati vazhdon për këtë çështje.
Borel thekson se shumëgjuhësia është një nga shtyllat themelore të Zvicrës dhe se vendi duhet ta mbrojë atë përballë zgjerimit të përdorimit të anglishtes. "Zvicra është ndërtuar mbi disa gjuhë. Është e rëndësishme që shkollat të vazhdojnë t'u japin përparësi gjuhëve kombëtare," tha ajo, duke kërkuar një qasje që nxit "takimin mes komuniteteve" dhe jo ndarjen.
Burim: Albinfo.ch
— Redaksia ZHURMA