Nismë në Berlin për përfshirjen e gjuhës shqipe në shkolla publike

Një nismë për futjen e gjuhës shqipe si lëndë në shkollat publike ka filluar në Berlin të Gjermanisë, me synim ruajtjen dhe promovimin e gjuhës amtare te fëmijët e komunitetit shqiptar. Iniciativa është ndërmarrë nga Besa Limani, e cila është e diplomuar në Biologji Aplikative në Universitetin e Prishtinës dhe jeton prej vitesh në kryeqytetin gjerman me familjen e saj.

Limani ka nisur mbledhjen e nënshkrimeve të prindërve shqiptarë në distriktin ku jeton, për të krijuar kushte që fëmijët të mësojnë dhe zhvillojnë gjuhën e tyre amtare. Ajo ka shprehur shqetësimin për numrin e ulët të prindërve që regjistrojnë fëmijët në mësimin plotësues, duke bërë thirrje për përkrahjen e nismës dhe rëndësinë e ruajtjes së identitetit kombëtar në diasporë.