Vlera Halimi Fazlija zgjidhet sekretare në Asociacionin Amerikan të Shëndetit Publik

Profesoresha me prejardhje nga Presheva, Vlera Halimi Fazlija, e cila jeton dhe vepron në Shtetet e Bashkuara të Amerikës, ka shënuar një sukses të ri në rrugëtimin e saj akademik duke u zgjedhur sekretare e Seksionit të Shëndetit Oral në Asociacionin Amerikan të Shëndetit Publik. Kjo organizatë profesionale përbën një nga emrat më të rëndësishëm në fushën e shëndetit publik në vend, ndërsa detyra e re konfirmon arritjet e një profesionisteje shqiptare në shkencën amerikane.

Lajmi për këtë përzgjedhje është bërë i ditur nga vetë ajo nëpërmjet një publikimi në rrjetet sociale, ku ka ndarë gjithashtu detaje nga pjesëmarrja në konferencën vjetore të organizatës të mbajtur në San Antonio të Teksasit. Gjatë këtij organizimi, ajo ka prezantuar punën e saj kërkimore dhe ka bashkëbiseduar me specialistë të fushës rreth temave që prekin barazinë në shëndetësi, drejtësinë sociale dhe avancimin e shëndetit oral.

Fazlija u shpreh se ndihet e nderuar për besimin e dhënë, duke shtuar se pret të japë kontributin e saj në misionin e organizatës për mbështetjen e politikave dhe barazinë në shëndetin oral. Ajo ka bërë me dije se përvojat dhe njohuritë e grumbulluara do t'i përcjellë te studentët dhe kolegët për të forcuar procesin mësimor, praktikën profesionale dhe kërkimin shkencor.