Shkollat e Prishtinës, nesër ora e parë për historinë e UÇK-së

PRISHTINË — Të gjitha shkollat e kryeqytetit janë njoftuar nga Komuna e Prishtinës që nesër ora e parë e mësimit të fokusohet te Ushtria Çlirimtare e Kosovës dhe historia e luftës për çlirimin e vendit. Kërkesa, e cila u është dërguar institucioneve arsimore, parashikon që nxënësit të trajtojnë rrugëtimin e vështirë për liri dhe shtetndërtim, si dhe sakrificat e popullit të Kosovës.

Në shkresën e datës 15 shtator, Drejtoria e Arsimit kërkon që temat të jenë të përshtatshme për moshën e nxënësve dhe të përfshijnë rëndësinë e luftës së UÇK-së, kontributin e qytetarëve dhe proceset gjyqësore në Hagë ndaj ish-krerëve të UÇK-së, përfshirë edhe vendimin që pritet të merret. Qëllimi i kësaj ore, sipas kërkesës, është që nxënësit të njihen me të kaluarën e afërt dhe të reflektojnë mbi vlerën e lirisë, paqes dhe kujtesës kolektive.