Si u festua “Salvation Day” i Azerbajxhanit në Elbasan?
Ambasada e Azerbajxhanit mbështet me dhurata 50 fëmijë me nevoja të veçanta, duke e cilësuar aktivitetin si urë bashkëpunimi mes dy vendeve.
ELBASAN — Në ambientet e Qendrës Shqiptare për Fëmijët me Nevoja të Veçanta në qytetin e Elbasanit është organizuar një aktivitet festiv me rastin e “Salvation Day” të Republikës së Azerbajxhanit. Ky organizim miqësor bëri bashkë institucionet vendore, përfaqësues të komunitetit dhe fëmijë, me mbështetjen e plotë të Ambasadës së Azerbajxhanit në Shqipëri.
Gjatë këtij aktiviteti, u shpërndanë dhurata, certifikata dhe çmime vlerësimi për 50 fëmijë me nevoja të veçanta për angazhimin e tyre. Në këtë organizim morën pjesë përfaqësues të Prefekturës së Elbasanit, Këshillit të Qarkut Elbasan dhe shoqërisë civile, të cilët ndoqën një program artistik dhe festiv të përgatitur posaçërisht për këtë ditë solidariteti.
Ambasadori i Azerbajxhanit në Shqipëri, Anar Huseynov, deklaron se mbështetja e shtetit të tij për Shqipërinë ka qenë gjithmonë e pranishme në çdo fushë të bashkëpunimit. Ai thekson se ngjarje të tilla forcojnë partneritetin e ngushtë dhe marrëdhëniet e shkëlqyera ndërmjet dy vendeve dhe popujve tanë.
Ndërkaq, presidentja e qendrës, Rudina Çollaku, vë në dukje se Azerbajxhani përbën një portë të rëndësishme për Shqipërinë drejt Azisë Qendrore. Ajo shton se të dyja vendet i bashkon jo vetëm miqësia, por edhe kultura, traditat, arti dhe vlerat e përbashkëta.
Burim: Almakos
— Redaksia ZHURMA
