Sa miliardë euro kushton 'Rilindja Urbane 2.0' e Ramës?
Kryeministri tha se "zgjedhjet nuk fitohen më me asfalt dhe çakull", pasi rritja e standardeve u solli qytetarëve pritshmëri më të larta.
TIRANË — Kryeministri Edi Rama prezantoi të premten programin "Rilindja Urbane 2.0", me një objektiv financimi prej 1.5 miliardë eurosh. Sipas Ramës, programi vjen si përgjigje ndaj ndryshimeve që ka kaluar Shqipëria, pasi rritja e standardeve të jetesës ka sjellë edhe pritshmëri më të larta nga qytetarët.
"Sot zgjedhjet nuk fitohen me asfalt dhe çakull", u shpreh kryeministri, duke nënvizuar se zhvillimi i deritanishëm kërkon politika dhe investime që shkojnë përtej infrastrukturës bazë. Sipas tij, ndryshimi mes fazës së parë dhe të dytë të Rilindjes Urbane është kalimi nga transformimi fizik te një model më i avancuar zhvillimi.
"Sa më shumë përmirësohen kushtet, aq më shumë bie në sy si e papranueshme ajo që mundon", tha Rama, i cili kujtoi paralajmërimin e tij pas zgjedhjeve të fundit se rezultati ishte "një bekim po aq sa një mallkim", përballë kërkesave më të mëdha të qytetarëve.
Burim: Almakos, Tetova Sot, Euronews Albania
— Redaksia ZHURMA