Sa ka rritur Qeveria e Mickovskit pagat dhe pensionet në Maqedoninë e Veriut?

SHKUP — Kryetari i Qeverisë së Maqedonisë së Veriut, Hristijan Mickoski, ka deklaruar se në dy vitet e qeverisjes së tij, paga mesatare është rritur me 8 mijë denarë, ndërsa pensionet me 7 mijë denarë. Në një intervistë për emisionin "Tema e Ditës" në TV Sitel, Mickoski theksoi se kjo rritje, megjithëse e pamjaftueshme sipas tij, përfaqëson një përparim të rëndësishëm duke pasur parasysh situatën fillestare.

Pensioni mesatar, i cili para ardhjes së kësaj qeverie ishte rreth 14–15 mijë denarë, është rritur për 40–45 për qind brenda dy viteve. Mickoski vuri në dukje se rritja ekonomike ka dyfishuar, nga 1.8 për qind në 3.5 për qind, ndërsa nxënësit tashmë marrin tekste shkollore të reja që në prill për vitin shkollor që fillon në shtator.

Në fushën e infrastrukturës, qeveria ka nisur ndërtimin e gjashtë segmenteve autostradash. Ndër projektet më të rëndësishme është autostrada Bllacë–Shkup, për të cilën do të nënshkruhet kontrata së hënë, si dhe segmenti Bukojçan–Kërçovë, i cili pritet të përfundojë së shpejti. Autostrada Kërçovë–Ohër do të jetë e përdorshme vitin e ardhshëm, ndërsa 10 kilometrat e parë të autostradës Prilep–Manastir do të hapen për qarkullim.

Mickoski theksoi edhe rritjen e prodhimit bujqësor: në vitin 2024 u prodhuan 16 milionë kilogramë duhan, ndërsa në 2025 ky shifër u dyfishua në 26 milionë kilogramë. Prodhimi i rrushit u rrit nga 70 milionë kilogramë në 120–130 milionë kilogramë. Akumulimet ujore, të cilat në gusht 2024 ishin vetëm 8 për qind të mbushura, sot kanë arritur në 80 për qind.

Përveç kësaj, Mickoski përmendi se në Ndërmarrjen Publike "Pyjet Nacionale" dhe në Ekonominë e Ujërave kishte tre paga të papaguara, ndërsa tani pagat paguhen me rregull. Ai vuri në dukje se qeveria e tij punon me përkushtim për të realizuar projektet dhe për të përmirësuar jetën e qytetarëve.

Burim: Tetova Sot
— Redaksia ZHURMA