Revokohet licenca e ALTA Bankës në Serbi pas dyshimeve financiare

Banka Kombëtare e Serbisë (NBS) i ka revokuar licencën e operimit ALTA Bankës në Beograd, pronë e biznesmenit Davor Macura që raportohet se ka lidhje me Partinë Përparimtare Serbe të presidentit Aleksandar Vuçiq. Bordi Ekzekutiv i Bankës Qendrore mori këtë vendim pasi konstatoi se gjendja financiare e bankës ishte përkeqësuar ndjeshëm dhe paraqiste rrezik për interesat e depozituesve. Sipas të dhënave të institucionit, llogaritë e bankës janë bllokuar prej 30 tetorit 2026, ndërsa kompensimi i depozitave të siguruara do të mundësohet brenda shtatë ditëve të punës dhe procedurat e falimentimit pritet të administrohen nga Agjencia e Sigurimit të Depozitave me vendim gjykate. Revokimi i licencës pason pretendimet serioze për transaksione të mëdha dhe përpjekje për transferimin e parave jashtë shtetit.

Kryetari i Partisë Demokratike në Serbi, Srdan Milivojeviq, ka ngritur padi penale duke kërkuar ndërhyrjen urgjente për të ndaluar një transferim prej 50 milionë eurosh nga ALTA Banka drejt një banke korrespondente jashtë Serbisë. Ai pretendon se banka kishte kërkuar konvertimin e një shume të madhe parash nga dinarë në euro dhe se guvernatori e kishte miratuar veprimin pa ndjekur procedurën e zakonshme, duke përgatitur më pas transferimin e fondeve në një llogari të institucionit financiar jashtë vendit. «Ka arsye të mjaftueshme për të ngritur një padi penale për ta ndaluar urgjentisht këtë», ka deklaruar Milivojeviq. Ndërkohë, zëvendësprokurorja e Shtetit për Krimin e Organizuar, Jasmina Milanoviq-Ganiq, është njoftuar për pretendimet dhe janë ndërmarrë masa verifikimi. Edhe avokati Ivan Niniq kishte ngritur shqetësimin për një proces të përshpejtuar të transferimit të kapitalit drejt Moskës dhe Shkupit. Këto zhvillime kanë nxitur reagime në Maqedoninë e Veriut, ku zyrtari i SDSM-së, Andrej Zhernovski, ka kërkuar përgjigje nëse vendi po shndërrohej në pikë tranziti për transferimin e parave drejt Moskës, pas raportimeve për lëvizje të pazakonta të kompanive të Grupit ALTA, përfshirë ALTA Pay.