Bllokimi i cisternave ruse në Arktik ngadalëson planin e Moskës drejt Kinës

Një grup cisternash ruse të sanksionuara u ankoruan rreth 1.300 kilometra në veri të Rrethit Arktik në korrik, pasi mbetën të bllokuara në Ngushticën e Vilkitskit përgjatë Rrugës Veriore Detare drejt Kinës. Ndihma nga dy akullthyese me energji bërthamore ishte disa ditë lundrim larg, ndërsa kjo pikë e ngushtë detare prej 55 kilometrash gjerësi ndodhet midis bregdetit të Siberisë veriore dhe ishullit Bolshevik.

Kremlini ka investuar shuma të mëdha me shpresën se tërheqja e akullit detar do të hapte këtë rrugë detare që më parë ishte e pakalueshme. Kjo rrugë tregtare konsiderohet strategjike pasi ndodhet jashtë rrezes së sulmeve me dronë ukrainas dhe larg mundësisë së ndërhyrjes nga flotat detare evropiane kundër anijeve të flotës në hije. Këtë vit, përmes këtij kalimi, eksportet ruse të naftës bruto dhe gazit të lëngshëm natyror arritën nivele rekord.

Qendra për Logjistikën e Veriut të Largët, e financuar nga Norvegjia, njoftoi se deri në fund të muajit të kaluar Rusia kishte transportuar rreth 2 milionë tonë ngarkesa, ose afërsisht 15 milionë fuçi naftë bruto, përgjatë gjithë rrugës drejt Kinës dhe vendeve të tjera aziatike. Pjesa më e madhe e këtyre ngarkesave u nis nga porti i Murmanskut në Detin Barent. Ndërkohë, Reuters raportoi, duke cituar tregtarë dhe të dhëna të transportit detar, se deri në mesin e muajit tetor kjo shifër arriti në rreth 20 milionë fuçi, duke shënuar një rritje prej 50 për qind krahasuar me vitin 2025. Megjithatë, kjo sasi përfaqëson vetëm rreth 1 për qind të eksporteve të përgjithshme detare të naftës ruse.

Presidenti rus Vladimir Putin deklaroi muajin e kaluar, gjatë ceremonisë së nisjes së projektit të naftës Vostok Oil në Gadishullin Tajmir, se kjo rrugë ka rëndësi kyçe në situatën e tanishme ndërkombëtare si një kalim i sigurt drejt tregjeve të mëdha. Putin tha se në vitin 2025 përgjatë saj u transportuan 37 milionë tonë mallra dhe parashikoi se shifra do të dyfishohet deri në vitin 2030, ndonëse zyrtarët e Kremlinit që nga viti 2019 synonin arritjen e 80 milionë tonëve deri në vitin 2024.

Ekspertët mjedisorë dhe të sigurisë detare theksojnë se pengesat teknike mbeten serioze. Ksenia Vakhrusheva nga organizata mjedisore Bellona shpjegoi për Radion Evropa e Lirë se shkrirja e akullit krijon pjesë që pluskojnë dhe grumbullohen nëngushtica, duke bllokuar anijet që nuk kanë klasifikimin e duhur për lundrim në akull. Nga ana e tij, Tomas Alexa nga kompania e konsulencës Ambrey deklaroi se rritja e aktivitetit nis nga një nivel i ulët dhe se Rusia po përpiqet të riafirmohet si një partnere e besueshme për Indinë dhe Kinën.