Raporti i BE-së: Qeveria ishte shumicën e kohës në detyrë

Raporti i Progresit për Kosovën për vitin 2026 ka evidentuar se Qeveria ishte në statusin e qeverisë në detyrë gjatë pjesës më të madhe të periudhës raportuese, duke kufizuar efektivitetin e qeverisjes dhe duke vonuar reformat, sipas Komisionit Evropian. Funksionet e plota qeveritare u rikthyen pas formimit të Qeverisë në shkurt 2026 dhe përsëri në shtator 2026. Njëkohësisht, sipas raportit, një numër i konsiderueshëm i deputetëve të rinj të zgjedhur vazhduan të ushtronin funksione në ekzekutiv, një praktikë që nuk përputhet me dispozitat e Kushtetutës dhe Ligjit për Qeverinë.

Sipas Komisionit Evropian, mungesa e mbikëqyrjes parlamentare e dobësoi efektivitetin e mekanizmave të llogaridhënies, ndërsa autoritetet e pavarura rregullatore dhe Institucioni i Avokatit të Popullit vazhduan punën me ndikim të kufizuar. Koordinimi ndërmjet nivelit qendror dhe atij lokal vazhdon të jetë kryesisht reaktiv, duke ndikuar në zbatimin e përgjegjësive dhe zhvillimin lokal, siç thekson raporti. Në dhjetor 2025, zgjedhja e kryetarëve shqiptarë të Kosovës në komunat me shumicë serbe u cilësua si hap i rëndësishëm drejt qeverisjes lokale përfaqësuese, ndonëse udhëheqjet e ja u përballën me pengesa si mungesa e qasjes në arkiva dhe stafi i trashëguar.

Marrëdhëniet ndërmjet autoriteteve qendrore dhe komunave me shumicë serbe mbeten të tensionuara për shkak të kërkesave gjuhësore dhe kufizimeve nga Policia dhe Ministria e Administrimit të Pushtetit Lokal. Sipas raportit, një çështje tjetër është përfaqësimi i pamjaftueshëm i komuniteteve joshumicë, ndërsa veçohet emërimi i dy zëvendësministrave nga komuniteti serb i Kosovës në mars 2026 pa miratimin formal të shumicës së deputetëve serbë, gjë që sipas Komisionit Evropian ka ngritur shqetësime për të drejtat e tyre kushtetuese.