QKUK nis përdorimin e teknikës SBRT për trajtimin e kancerit

Në Klinikën e Onkologjisë në Qendrën Klinike Universitare të Kosovës ka nisur aplikimi i teknikës së avancuar të radioterapisë SBRT për pacientët që lëngojnë nga kanceri i mushkërive. Ky shërbim realizohet përmes akseleratorit linear Elekta Versa HD, pajisje që mundëson rrezatim më preciz dhe trajtim të targetuar të tumoreve. Ministri i Shëndetësisë, Arben Vitia, tha se investimet në teknologji moderne dhe ngritja profesionale e stafit u sigurojnë pacientëve mbrojtje më të madhe të indeve të shëndosha dhe numër më të vogël seancash, kur kjo është e përshtatshme. Ky hap vlerësohet si një zhvillim i rëndësishëm për sistemin publik shëndetësor. Gjatë kësaj kohe, në kuadër të Ditës Ndërkombëtare të Fizikës Mjekësore, u shpreh mirënjohje për fizikanët mjekësorë, onkologët radioterapeutë dhe teknikët e radioterapisë për kontributin e tyre.