Jonida Maliqi flet për të birin dhe akuzon psikologen

E ftuar në emisionin televiziv «Goca dhe Gra», këngëtarja Jonida Maliqi ka ndarë detaje rreth rritjes dhe zhvillimit të djalit të saj, Danit, i cili është diagnostikuar me spektrin e autizmit. Ajo ka treguar se e pranoi menjëherë se i biri ishte ndryshe nga fëmijët e tjerë, por përballja me institucionet e para shënoi një moment tejet të vështirë.

Sipas Maliqit, në fund të vitit 2015, gjatë një vizite tek një psikologe, asaj dhe ish-bashkëshortit iu tha se nuk ishin prindër të denjë dhe se fëmija i tyre nuk do të fliste apo socializohej kurrë. Këngëtarja ka drejtuar akuza të drejtpërdrejta ndaj psikologes Anjeza Dishnica, duke e cilësuar komunikimin e saj si «mënyrën më bastarde të mundshme» dhe duke shtuar: «Turp të kesh, sepse një prindi, sido që të jetë fëmija e vet, nuk i komunikohet në këtë mënyrë.»

Pas kësaj prove të rëndë, Maliqi tregoi se u drejtua te qendra e Liri Berishës, ku me ndihmën e një ekipi prej pesë mjekësh, Dani ka shënuar progres të ndjeshëm, shkon në shkollë dhe flet dy gjuhë. Në të njëjtën intervistë, ajo preku edhe çështjen e gjyqit për ndarjen me ish-bashkëshortin, duke theksuar se i ka lënë zgjidhjet në dorë të drejtësisë, ndërsa fëmija mbetet gjithmonë epiqendra e vëmendjes dhe komunikimit të tyre.