Kurtishi: Mbi 85% e barnave esenciale në Onkologji janë në dispozicion

Mbi 85 deri në 90 për qind e barnave nga lista esenciale gjenden në dispozicion në Klinikën e Onkologjisë në Qendrën Klinike Universitare të Kosovës, ku sipas drejtorit Ilir Kurtishi mungesat e disa medikamenteve gjatë këtij viti ishin të përkohshme dhe të menaxhueshme. Kurtishi ka deklaruar se në periudha të caktuara ka pasur mungesa të barnave që janë futur për herë të parë në listën esenciale, për të cilat kërkesa doli të ishte më e madhe se planifikimet fillestare dhe ka pasur vonesa edhe nga operatorët ekonomikë që i sjellin medikamentet në klinikë.

Në disa raste pacientët janë ballafaquar me vonesa në marrjen e terapisë prej shtatë deri në nëntë javësh, ndërsa furnizimi me disa medikamente u vonua për dy deri në tri javë ose një muaj, ka bërë të ditur drejtori. Duke shpjeguar se trajtimi është përshtatur sipas gjendjes aktuale dhe protokolleve mjekësore, ai ka theksuar se klinika ofron shërbime me kapacitet të plotë, ku vetëm në shërbimin e radioterapisë trajtohen më shumë se 1200 pacientë në javë, ndërsa 130 deri 150 pacientë në ditë marrin shërbime të sofistikuara radioterapeutike dhe brachyterapisë.