Onet: Autori i sulmit me gjashtë të vrarë në Poloni është Michał O.

Sipas gazetës Onet, autori i sulmit të armatosur në qytetin jugor të Krakovit, ku mbetën të vrarë gjashtë persona dhe u plagosën 15 të tjerë, është identifikuar si Michał O. nga Ostrowiec Świętokrzysk. Policia lokale kishte njoftuar më parë se i dyshuari ndodhej në paraburgim, ndërsa Ministria e Brendshme e Polonisë konfirmoi se ai është shtetas polak.

Ngjarja e rëndë kishte ndodhur kur sulmuesi hyri me veturë në Sheshin Kryesor të qytetit dhe nisi të qëllonte në mënyrë të rastësishme nga automjeti i tij. Siç bëri të ditur administrata rajonale dhe policia, viktimat e këtij sulmi janë katër gra dhe dy burra, kurse 15 persona të tjerë pësuan plagë nga të shtënat.

Ministri i Brendshëm dhe Administratës deklaroi se në mesin e të plagosurve janë edhe dy zyrtarë policorë, prej të cilëve njëri ndodhet në gjendje shumë të rëndë pasi u qëllua tri herë me armë zjarri dhe po i nënshtrohet një operacioni. Sipas informacioneve të siguruara nga gazeta Onet, i dyshuari Michał O. kishte leje për të poseduar dy armë zjarri. E njëjta gazetë raportoi se babai i tij posedonte 11 armë, ndërsa vetura me të cilën lëvizte sulmuesi ishte e regjistruar pikërisht në emër të babait të tij.

Policia kishte raportuar më herët se autori ishte i veshur me veshje të stilit ushtarak dhe kishte përdorur armë ushtarake, ndërsa armë të tjera u gjetën edhe brenda automjetit të tij. Megjithëse gjendja e të dyshuarit të arrestuar për vrasjen e gjashtë personave është cilësuar si stabile, autoritetet vijojnë hetimet për të zbardhur motivin e sulmit, identitetet e viktimave dhe gjendjen shëndetësore të të plagosurve.