Qiratë ditore shpëtojnë tregun e hidrosanitareve — rriten importet nga turizmi
Investimet private të familjeve po bien për të tretin vit radhazi, duke u zëvendësuar nga 27 mijë njësi të listuara për qira ditore.
TIRANË — Pronarët e apartamenteve që jepen me qira ditore për turistët e huaj po shpëtojnë tregun e pajisjeve hidrosanitare në Shqipëri, duke zëvendësuar kërkesën në rënie të familjeve dhe emigrantëve. Sipas të dhënave të fundit, investimet në apartamente, vila dhe shtëpi private për qiradhënie ditore po shërbejnë si mbështetja kryesore për këtë sektor.
Ndërsa projektet e reja të qirave afatshkurtra po zgjerohen me shpejtësi, kërkesa tradicionale për pajisje hidrosanitare ka shënuar një trend tjetër. Investimet private dhe rinovimet e banesave nga familjarët apo emigrantët kanë pësuar rënie për të tretin vit radhazi, duke reflektuar një ngadalësim të ndjeshëm të konsumit të brendshëm në këtë kategori.
Të dhënat zyrtare nga Doganat tregojnë se gjatë periudhës janar-maj 2026 është regjistruar një rritje e importit të pajisjeve hidrosanitare, ndonëse ka pasur një rënie për pllakat. Kjo rritje i atribuohet kryesisht bumit të akomodimeve turistike përmes platformave të njohura si Airbnb, Booking dhe Expedia, të cilat kërkojnë rinovime të shpeshta.
Sipas të dhënave të analizës nga njësia AidDNA, në fund të marsit 2026 në Shqipëri numëroheshin rreth 27 mijë njësi të listuara për qira ditore. Ky treg udhëhiqet nga Vlora dhe Saranda me 10.3 mijë njësi, Tirana me 5.3 mijë, Durrësi me gati 4 mijë dhe Golemi me 1.4 mijë njësi.
Burim: Monitor
— Redaksia ZHURMA