Shqipëria shënon çmime më të larta energjie në rajon gjatë vitit 2025

Shqipëria u radhit ndër tregjet më të shtrenjta të energjisë elektrike me shumicë në rajon gjatë vitit 2025, duke shënuar një mesatare prej 118.2 euro për megavatorë (MWh). Kjo shifër është rreth 14% më e lartë se ajo e Greqisë dhe 9.5% më e lartë se në Maqedoninë e Veriut, sipas të dhënave të publikuara nga Agjencia e Bashkimit Evropian për Bashkëpunimin e Rregullatorëve të Energjisë (ACER).

Raporti i ACER analizon integrimin e tregjeve evropiane të energjisë dhe diferencat e çmimeve ndërmjet shteteve. Në vitin 2024, çmimet kishin qenë më të ulëta, ndërsa gjatë vitit 2025 rritja e çmimeve përfshiu të gjithë rajonin, por me ritme të ndryshme në vende të ndryshme. Agjencia vëren se shtetet e Ballkanit Perëndimor që bëjnë pjesë në Komunitetin e Energjisë mbetën ndër tregjet më të kushtueshme, ku Shqipëria, Kosova dhe Mali i Zi regjistruan vlera 10 deri në 15 euro për megavatorë më të larta se vendet fqinje që janë anëtare të Bashkimit Evropian.

Sipas raportit të ACER, çmimi mesatar i energjisë në Shqipëri u rrit me 6.2 euro/MWh në krahasim me vitin 2024. Në të njëjtën periudhë, Greqia regjistroi një rritje prej vetëm 2.7 euro/MWh, ku çmimi në tregun e një dite përpara arriti në 103.6 euro/MWh, ose 14.6 euro më pak se në Shqipëri. Në Maqedoninë e Veriut dhe në Serbi çmimi mesatar ishte 107.9 euro/MWh, në Bullgari u regjistrua 106.9 euro/MWh, ndërsa në Mal të Zi arriti në 113.3 euro/MWh. Kosova kryesoi listën e këtyre tregjeve me 118.5 euro/MWh, duke kaluar Shqipërinë me 0.3 euro. Mali i Zi pati rritjen më të madhe vjetore me 14.8 euro/MWh, ndërsa rritjet e tjera ishin 4.5 euro/MWh në Kosovë, 5.5 euro/MWh në Maqedoninë e Veriut dhe 6.1 euro/MWh në Serbi.

Agjencia evropiane shpjegon se mungesa e integrimit të plotë të tregjeve në Evropën Juglindore ndikon drejtpërdrejt në ruajtjen e ndryshimeve të mëdha të çmimeve. Shqipëria dhe Kosova, të cilat zbatojnë një treg të përbashkët energjie, patën një diferencë çmimi më të vogël se 1 euro/MWh në 99% të orëve gjatë vitit 2025. Përkundrejt kësaj, përputhja e çmimeve në kufirin me Malin e Zi u shënua vetëm në 4% të orëve, kurse me Greqinë në vetëm 3%. Kur tregjet nuk janë të bashkuara, shkëmbimet ndërkufitare planifikohen përpara se të caktohen çmimet përfundimtare për ditën pasardhëse, gjë që pengon shfrytëzimin efikas të kapaciteteve.

Sipas vlerësimeve të ACER, thellimi i integrimit të tregjeve dhe shtimi i kapaciteteve të disponueshme për tregtinë ndërkufitare mund të ndihmojnë në përafrimin e çmimeve. Këto të dhëna i referohen vetëm tregut me shumicë dhe nuk pasqyrojnë tarifat e faturuara për familjet apo bizneset, por shërbejnë si tregues për konkurrueshmërinë e tregut shqiptar.