Punimet në Bypass-in e Tiranës i kalojnë 50 përqind

TIRANË — Kryeministri Edi Rama, ministri i Infrastrukturës dhe Energjisë Enea Karakaçi dhe kreu i Autoritetit Rrugor Shqiptar Ami Kozeli kanë inspektuar kantierin e Bypass-it të Tiranës, ku punimet në dy lotet e para të kontraktuara kanë kaluar nivelin 50 përqind. Aksi me gjatësi prej 21 kilometrash synon të çlirojë kryeqytetin nga trafiku i rëndë dhe të lidhë autostradat kryesore të vendit.

Ky aks rrugor shërben si një projekt infrastrukturor i integruar që ndërlidh autostradën Tiranë–Durrës në Kashar me autostradën Tiranë–Elbasan në zotërimin e zonës së Mulletit deri te nyja e TEG-ut. Ndërtimi i tij do t'u mundësojë automjeteve me destinacion jugun apo juglindjen e Shqipërisë të shmangin tërësisht hyrjen në rrugët e brendshme të kryeqytetit. Përveç lehtësimit të qarkullimit tranzit, vepra do të sigurojë ndërlidhjen direkte të fshatrave dhe njësive administrative përreth me rrjetin kryesor kombëtar.

Sipas të dhënave nga Autoriteti Rrugor Shqiptar, segmenti prej 10 kilometrash të parë po zbatohet nëpërmjet financimit direkt të kontraktuar nga ky institucion. Nga ana tjetër, për segmentin vijues prej 11 kilometrash, autoritetet shqiptare ndodhen në fazën përmbyllëse të bisedimeve me Bankën Europiane për Rindërtim dhe Zhvillim. Ky financim mbështetet edhe nga një grant prej 40 përqind, që kap vlerën e rreth 53 milionë eurove nga korniza e investimeve për Ballkanin Perëndimor.

Gjatë inspektimit në terren, ministri Enea Karakaçi njoftoi se marrëveshja e financimit me BERZH-in parashikohet të miratohet brenda tremujorit të parë të vitit 2027 për të mundësuar nisjen e punimeve në pjesën e mbetur prej 11 kilometrash. Ndërkohë, sipas parashikimeve të mëparshme të ARRSH-së, 8 kilometrat e parë të këtij bypass-i pritet të përfundojnë brenda vitit 2027, me synimin e deklaruar për t'i mbyllur procedurat përpara afatit zyrtar që është shtatori i atij viti. Gjithashtu, brenda muajit nëntor planifikohet të nisin shpronësimet e para për koncesionin Kashar–Rogozhinë, ndërsa deri në fund të vitit pritet fillimi i punimeve në aksin Kashar–Lekaj.

Ndërkohë, kryeministri Edi Rama deklaroi se ndërtimi i rrugës do të ndikojë drejtpërdrejt në rritjen e ndjeshme të vlerës së pronave për banorët e zonës. Ai garantoi se çdo proces shpronësimi do të realizohet me transparentë të plotë dhe në përputhje me kuadrin ligjor në fuqi, duke e cilësuar këtë aks si një zgjidhje përfundimtare për ngarkesën e tepërt të automobilave në hyrje të kryeqytetit.

Ministri i Infrastrukturës dhe Energjisë, Enea Karakaçi, u shpreh gjatë vizitës: «Ky segment do jetë një nyje strategjike e infrastrukturës rrugore, që do të lidhë akset e Korridorit Blu, si dhe autostradën Tiranë–Durrës me Tiranë–Elbasan. Dalim nga nevoja për të hyrë në Tiranë për çdo segmentim në jug. Kjo mbaron në shtator të vitit 2027. Synimi është ti mbyllim para afatit. Element i rëndësishëm është që projekti është i integruar. Nuk kemi vetëm një autostradë por kemi dhe ndërlidhjen e të gjitha fshatrave dhe njësive administrative. Projekti nuk lë jashtë këto njesi administrative apo banorët».

Nga ana e tij, kryeministri Edi Rama theksoi gjatë inspektimit në kantier: «Të gjithë duhet ta dinë se është rritje e ndjeshme e vlerës së pronës së tyre. Çdo shpronësim do bëhet ashtu siç duhet, sipas ligjit. Do jetë një aks që do ta çlirojë kryeqytetin nga një ngarkesë e tepërt që vjen si mungesë e këtij aksi. Në pjesë e fluksit do vazhdojë lirshëm drejt jugut, dhe pjesa tjetër do ketë më shumë lirshmëri për të hyrë e dalë në kryeqytet».