Alishani: Komuna e Prizrenit po favorizon një biznes përmes subvencioneve

PRIZREN — Asamblistja e Lëvizjes Vetëvendosje në Prizren, Dafina Alishani, ka ngritur akuza ndaj qeverisjes lokale për shkak të vendimit për subvencionimin e transportit urban. Sipas saj, ky program është dizajnuar për të favorizuar një biznes të caktuar, i cili kishte sjellë autobusët në qytet pa u përmbyllur ende thirrja publike. Alishani ka pretenduar se kriteret janë kurdisur paraprakisht për këtë operator dhe se komuna po ua kthen borxhin në kurriz të qytetarëve.

Në njoftimin e komunës është bërë e ditur se programi i subvencionimit të transportit do të nisë zbatimin më 2 nëntor 2026, me një vlerë prej 1.20 euro për kilometër për një periudhë pesëvjeçare. Nga ky shërbim pritet të përfitojnë pensionistët, nxënësit, studentët, punëtorët e arsimit, pjesëtarët e Policisë dhe Ushtrisë, zjarrfikësit, si dhe veteranët e luftës. Ndërkohë, asamblistja ka ftuar qytetarët që ta shfrytëzojnë këtë shërbim falas, pavarësisht se, sipas saj, vendimi do t'i kushtojë shumë buxhetit komunal.