Pse Prizreni kthehet në muze automobilistik çdo verë?

PRIZREN — Mbi njëqind automjete historike kanë pushtuar Prizrenin këtë verë, në edicionin e 26-të të ekspozitës retro-automobilistike të Shadërvanit. Koleksionistë nga Kosova, Shqipëria, Serbia, Mali i Zi dhe Maqedonia zgjodhën këtë qytet për të prezantuar xhevahiret e restauruara, duke bërë Prizrenin muze të hapur automobilistik.

Çdo vit, familje, të rinj dhe turistë zbresin drejt brigjeve të Lumbardhit, jo për pushime të zakonshme, por për të qenë pjesë e një skene ku kalendari humb vlerën. Në Shadërvan, sekondat nuk ecin përpara — ato kthehen pas.

Mjeti më i vjetër në ekspozitë është një Ford i vitit 1923, i zotëruar nga Alberti nga Deçani. Makina ka vetëm marsh përpara dhe prapa, pa asnjë ndërhyrje që kur u prodhua, thotë ai, dhe e nxjerr në Deçan e në Prishtinë vetëm për kënaqësinë e vet. Ka kushtuar shumë, por Alberti e mban shifrën sekret.

Ndër mjetet më të veçanta qëndron një Triumph i vitit 1965, blerë në Beograd 20 vjet më parë, por i ardhur fillimisht nga Zambia me diplomatë amerikanë. Sllobodan Jovanoviç, i cili e zotëron, vjen në Prizren për herën e 17-të. "Ky është pasioni im dhe në një farë mënyre puna ime, duke shitur pjesë për makinat e vjetra," thotë koleksionisti nga Serbia.

Ernit Pulaj, 20 vjeç, solli një Porsche të vitit 1974, blerë para 2-3 muajsh. Modeli është i rrallë: nga rreth 2.000 të prodhuara në botë, rreth 1.200 mund të jenë ende funksionale. "Është mirë të merresh, por është sport pak i shtrenjtë dhe duhet të jesh merakli që ta mbash, sepse është vështirë për servise," thotë ai.

Idriz Mushkolaj nga Deçani, organizator i ekspozitës, thotë se ky është viti i 26-të i traditës, me mysafirë nga Maqedonia, Shqipëria, Mali i Zi dhe rajoni. "Me këto makina prezantojmë kulturën e shtetit nga vijmë," thotë ai, duke shtuar se mjetet tregojnë si qarkullonin makinat në Kosovë që në vitet '50 dhe '60.

Burim: Shqiptarja
— Redaksia ZHURMA