Prishtinës i duhen edhe 100 punëtorë shëndetësorë për shkak të fluksit

PRISHTINË — Prishtinaballafaqohet me sfida të vazhdueshme në kujdesin parësor shëndetësor për shkak të numrit të madh të qytetarëve që marrin shërbime, ndonëse financimi dhe numri i mjekëve e infermierëve përcaktohen vetëm sipas banorëve të regjistruar zyrtarisht. Drejtori i Shëndetësisë në Komunën e Prishtinës, Bujar Gashi, ka deklaruar se në kryeqytet jetojnë mbi 300 mijë qytetarë, ndërsa institucionet shëndetësore nuk marrin fonde dhe numër të mjekëve për ata banorë që nuk figurojnë zyrtarisht në komunë, ku sipas regjistrimit janë mbi 227 mijë banorë.

Gashi ka thënë se komunës i duhen minimalisht edhe 100 punëtorë shëndetësorë në bazë të statistikave dhe numrit të vizitave, për të pasur mundësi që secili mjek të ketë kohë të mjaftueshme për konsulta të mirëfillta. Sipas tij, aktualisht një mjek mund të ketë 50 deri në 60 pacientë brenda një orari, gjë që pamundëson kohën e nevojshme prej 10 deri në 15 minuta për një konsultë. Komuna ka kërkuar vazhdimisht që financimi dhe stafi të përcaktohen në bazë të shërbimeve të realizuara, por ende nuk është arritur ndonjë dakordim me nivelin qendror për shkak të kritereve ligjore ekzistuese.