MSH: Në Kosovë janë licencuar 171 profesionistë shëndetësorë gjatë vitit 2025

Gjatë vitit 2025, gjithsej 171 profesionistë shëndetësorë shqiptarë janë licencuar për të punuar në Kosovë. Këto të dhëna i bëri të ditura Durim Elshani, këshilltar për media i ministrit të Shëndetësisë, Arben Vitia, duke iu referuar shifrave të Bordit për Licencimin e Profesionistëve të Huaj Shëndetësorë, ku përfshihen mjekë nga Kosova dhe nga trevat e tjera shqiptare.

Kjo lëvizje vjen pas një periudhe kur dhjetëra profesionistë kërkonin dokumentacionin për t'u larguar drejt vendeve evropiane. Sa i përket të dhënave krahasuese, gjatë vitit 2022 kishin kërkuar dokumente për aplikim jashtë vendit 211 profesionistë shëndetësorë. Ndërkaq, sipas shifrave më të fundit të Odës së Mjekëve të Kosovës, gjatë vitit 2025 ky numër ka zbritur në 95, duke shënuar nivelin më të ulët ndër vite.

Sipas sqarimeve të dhëna nga Durim Elshani, nga 171 profesionistët e licencuar gjithsej, 12 prej tyre janë me nënshtetësi të Kosovës, të cilët janë kthyer për të punuar në vendin e tyre pasi kanë përfunduar specializimet në shtetet evropiane. Ndërkaq, 159 të tjerët janë profesionistë shëndetësorë shqiptarë me nënshtetësi të huaj ose me dy nënshtetësi, të cilët kanë marrë licenca zyrtare për ushtrimin e profesionit brenda territorit të Kosovës.

Elshani ka sqaruar gjithashtu se kërkimi i dokumenteve të nevojshme prej 95 profesionistëve për aplikim jashtë vendit nuk do të thotë nevojshëm se ata janë licencuar apo janë vendosur përfundimisht në shtetet evropiane. Ai ka bërë me dije se ekzistojnë raste kur punonjësit shëndetësorë marrin pushim pa pagesë për të punuar përkohësisht jashtë vendit dhe më pas kthehen sërish për të vazhduar punën në Kosovë.