IKShPK: 299 raste me fruth në Kosovë, 30 gjatë javës së fundit

Gjatë periudhës nga 16 prilli deri më 8 nëntor 2026, në Kosovë janë konfirmuar gjithsej 299 raste me fruth, prej të cilave 30 janë regjistruar vetëm gjatë javës së fundit, sipas të dhënavë të publikuara nga Instituti Kombëtar i Shëndetësisë Publike të Kosovës.

Sipas IKShPK-së, rastet e infeksionit janë shpërndarë në 23 komuna të ndryshme të vendit, ku pjesa dërrmuese e të prekurve janë fëmijë të vegjël që nuk e kanë kaluar më parë sëmundjen.

Instituti Kombëtar i Shëndetësisë Publike të Kosovës bën të ditur se mbi 95 për qind e rasteve të konfirmuara i përkasin personave të pavaksinuar me vaksinën MMR, e cila ofron mbrojtje ndaj fruthit, parotitit dhe rubeolës. Sipas të dhënave zyrtare, fruthi paraqitet si një sëmundje shumë ngjitëse e cila mund të shkaktojë komplikime serioze shëndetësore, veçanërisht te fëmijët e vegjël dhe foshnjat që nuk mund të vaksionohen për arsye shëndetësore.

Në kuadër të masave parandaluese, IKShPK në bashkëpunim me institucionet shëndetësore po vazhdon zbatimin e vaksinimit plotësues për fëmijët që kanë mbetur pa u vaksinuar ose nuk i kanë marrë të dy dozat e paraprake. Sipas të dhënave të institutit, përmes këtyre aktiviteteve gjatë këtij viti janë vaksinuar mbi 4 mijë e 69 fëmijë të grupmoshës nga 2 deri në 5 vjeç, duke dëshmuar rëndësinë e angazhimit të prindërve dhe profesionistëve shëndetësorë.

Për të ndërprerë përhapjen e mëtejshme të sëmundjes, IKShPK u bën thirrje të gjithë prindërve që të kontrollojnë me kujdes statusin e vaksinimit të fëmijëve të tyre. Instituti thekson se në rast se fëmijët kanë humbur ndonjë dozë të vaksinës, prindërit duhet të kontaktojnë menjëherë ekipet e vaksinimit për ta plotësuar atë sa më parë, pasi vaksinimi në kohë mbetet masa kryesore për mbrojtjen e shëndetit publik në komunitet.