Hasani denoncon Pukën se përdori të njëjtën doktoraturë në Prishtinë dhe Romë

PRISHTINË — Profesori i së Drejtës Ndërkombëtare, Enver Hasani, i është drejtuar me një e-mail senatorëve të Universitetit të Prishtinës «Hasan Prishtina», Këshillit Drejtues dhe stafit të Fakultetit Juridik, duke pretenduar se dekani Avni Puka ka përdorur të njëjtën tezë doktorature të përkthyer nga shqipja në italisht në Universitetin «La Sapienza» të Romës për të fituar dy tituj të veçantë akademikë.

Sipas pretendimeve të Hasanit, ky rast përbën një nga skandalet më të rënda akademike që kanë përfshirë Universitetin e Prishtinës dhe Universitetin «La Sapienza» të Romës. Ai ka bërë të ditur se ka shqyrtuar personalisht faqe për faqe të dy disertacionet, duke konstatuar se nuk bëhet fjalë për dy hulumtime të pavarura shkencore, por për të njëjtën punim të mbrojtur më parë në Fakultetin Juridik në Prishtinë. Hasani ka sqaruar se rasti dallon nga programet e ligjshme të bashkëpunimit ndëruniversitar si doktoraturat e përbashkëta apo me bashkëmentorim, duke shtuar se rregullativat e UP-së e ndalojnë mbrojtjen e njëkohshme ose të njëpasnjëshme të së njëjtës tezë.

Në njoftimin e tij, profesori Hasani ka pretenduar gjithashtu se dekani Puka ka fshirë nga CV-ja e tij të dhënën për doktorimin në Itali vetëm një ditë pasi ai kishte denoncuar publikisht dyshimet. Hasani ka deklaruar se Puka nuk e ka bërë deri më sot nostrifikimin e diplomës nga universiteti italian, gjë që sipas tij lidhet me pasojat e mundshme ligjore dhe akademike. Puka nga ana e tij i ka mohuar kategorikisht këto pretendime për plagjiaturë e mashtrim, duke i cilësuar deklaratat e Hasanit si shpifje të rëndë, fyerje dhe përhapje të gënjeshtrave me qëllim dëmtimin e imazhit dhe reputacionit të tij.

Lidhur me hapat e mëtejshëm, Hasani ka njoftuar se u është drejtuar zyrtarisht edhe institucioneve kompetente në Itali, duke përfshirë Universitetin «La Sapienza» dhe Ministrinë italiane të Universiteteve dhe Kërkimit, për të kërkuar sqarime mbi ligjshmërinë e procedurave. Gjithashtu, ai ka bërë të ditur se Prokuroria e Kosovës u ka drejtuar autoriteteve italiane një kërkesë disa muaj më parë, ndërsa u ka bërë thirrje anëtarëve të Këshillit Drejtues dhe stafit akademik në Prishtinë që t'i shqyrtojnë disertacionet e bashkëngjitura në e-mail.

«Pas një shqyrtimi të hollësishëm, të kryer personalisht, faqe për faqe, kam konstatuar se nuk bëhet fjalë për dy hulumtime të pavarura shkencore, por, në thelb, për të njëjtën tezë doktorature, të përkthyer nga shqipja në italisht dhe të përdorur për fitimin e dy titujve të veçantë akademikë», ka shkruar Hasani në e-mailin drejtuar drejtuesve të universitetit.