Prind denoncon kushtet në Klinikën Infektive të QKUK-së

PRISHTINË — Një prind, fëmija e të cilit po trajtohet për fruth në Klinikën Infektive të QKUK-së, ka denoncuar për Sinjalin kushtet në repart, duke dërguar pamje që tregojnë higjienë të dobët dhe mbeturina të hedhura në të njëjtin vend. “Nuk e di a ka ardhur të shërohet apo të marrë ndonjë infeksion tjetër”, ka deklaruar ai.

Prindi është ankuar edhe për mungesën e personelit: sipas tij, në të dy ndërrimet e ditës punon vetëm një infermiere për të gjithë repartin, edhe pse shërbimi i tyre, thotë ai, mbetet i mirë pavarësisht kushteve të vështira në klinikë.

Sipas prindit, mungojnë edhe materialet bazë. Fëmija i tij pati dy kriza gjatë ditës; në të parën temperatura arriti 40 gradë Celsius, ndërsa në repart nuk kishte medikamente për uljen e saj, prandaj familja u detyrua të shkonte urgjentisht në barnatore.

Në krizën e dytë, kur fëmijës iu desh oksigjen, në repart nuk kishte maskë për dhënien e tij, ka pretenduar prindi për Sinjalin, duke shtuar se kushtet e dhomave janë po aq problematike sa mungesa e stafit e medikamenteve.

Në dhoma mungojnë perdet, roletat dhe mbulesat e dritareve, prandaj familjet improvizojnë me çarçafë. Dielli bie pa ndërprerje dhe dhoma nxehet shumë, ndërsa dera që lidh dhomën me tarracën nuk mbyllet natën, duke e ftohur ambientin kur fëmijët kanë temperaturë e djersitje.

Prindi pretendon se fëmija u infektua në kopshtin “VIP KIDS 2” në Bresje të Fushë Kosovës, pa konfirmim zyrtar nga institucionet. Menaxherja e kopshtit i ka konfirmuar Sinjalit se disa fëmijë janë të prekur me fruth: “Jam në dijeni, fëmijët kanë fruth. Fruthi u ka rënë”, ka thënë ajo.

Drejtoresha e Klinikës Infektive, Vera Berisha-Ndrejaj, i ka bërë të ditur Sinjalit se vetëm gjatë asaj dite ishin konfirmuar katër raste të reja me fruth te fëmijët. Denoncimi vjen ndërsa fruthi po shtron edhe fëmijë të tjerë në QKUK, duke ngritur pikëpyetje mbi gatishmërinë e klinikës.

Burim: Sinjali
— Redaksia ZHURMA