Viktima e 11-të nga ethet e Nilit Perëndimor në Maqedoni

Një paciente 66-vjeçare nga Rosomani ka ndërruar jetë në Klinikën për Sëmundje Infektive, duke e çuar në 11 numrin e përgjithshëm të viktimave nga ethet e Nilit Perëndimor që nga fillimi i epidemisë. Drejtori i Klinikës Infektive, Fadil Cana, bëri të ditur se te pacientja ishte konfirmuar në laborator forma më e rëndë e infeksionit që prekte sistemin nervor qendror, ndërsa gjendja e saj rëndohej nga shumë sëmundje kronike shoqëruese.

Cana shtoi se në Klinikë është shtruar edhe një paciente tjetër me një formë të rëndë të sëmundjes, e cila ka qenë në njësinë e kujdesit intensiv për një kohë të gjatë, ndodhet në ventilim mekanik dhe qendron në Klinikë për gati një muaj. Sipas Ministrisë së Shëndetësisë, nuk ka pasur asnjë rast të ri të shtruar në spital që nga 25 shtatori.

Për ethet e Nilit Perëndimor nuk ka bar konkret antiviral, ndërsa mjekimi synon lehtësimin e simptomave, pushimin dhe konsumimin e lëngjeve. Mbrojtja më e mirë mbetet shmangia e pickimit të mushkonjave përmes repelentëve, rrobave me mëngë të gjata, rrjetave mbrojtëse dhe largimit të ujit të ndenjur.