Hoxhaj thotë se Kosovës i duhet një transformim rrënjësor në arsim

Kryetari i Komisionit Parlamentar për Arsim dhe Shkencë, Enver Hoxhaj, ka kërkuar një transformim rrënjësor të sistemit arsimor në Kosovë pas një tryeze të mbajtur për sfidat dhe prioritetet në arsimin parauniversitar. Ai njoftoi se deputetë, profesorë universitarë, studiues dhe aktivistë të shoqërisë civile kanë kërkuar konsensus nacional që duhet të përkthehet në një Pakt Kombëtar për Arsimin, rishikim të formulës së financimit dhe rritje të buxhetit.

Pjesëmarrësit në diskutime e cilësuan gjendjen në arsim si alarmante dhe vlerësuan se situata po përkeqësohet. Si një tregues shqetësues në këtë drejtim u përmendën rezultatet e dobëta të nxënësve në testin ndërkombëtar PISA, duke nxitur kërkesën për ndërhyrje që nisin që nga edukimi i hershëm.

Gjatë tryezës, e cila synohet të shërbejë si platformë e hapur dialogu, u diskutua për disa prioritete kryesore si investimet në infrastrukturën arsimore, shtimi i hapësirave për çerdhe dhe krijimi i kushteve për mësim tërëditor në shkollat fillore e të mesme. Po ashtu, u ngrit nevoja për rishikimin e plotë të kurrikulës shkollore, përshtatjen e teksteve mësimore, zhvillimin profesional të mësimdhënësve dhe rritjen e pagave të tyre. Vëmendje e veçantë iu kushtua digjitalizimit të arsimit dhe forcimit të aftësive të nxënësve në lexim, matematikë dhe shkenca.

Hoxhaj deklaroi se konsensusi nacional, financimi dhe rritja e buxhetit përbëjnë shtyllat kryesore mbi të cilat duhet të ndërtohet i gjithë transformimi i sistemit arsimor dhe e ardhmja e fëmijëve.

«Reforma nuk mjafton. Arsimit në Kosovë i duhet një transformim rrënjësor, duke nisur nga edukimi i hershëm dhe në çdo nivel të arsimit parauniversitar», ka shkruar Hoxhaj në një postim në Facebook.