Ish-polici Pinjolli dënohet me 5 vjet burg për grabitjen e arit në Gostivar
Ish-oficeri i Kërçovës çaktivizoi radion e policisë dhe u hapi rrugë grabitësve me “BMW X5” e “Sharan”, sipas gjykatës.
GOSTIVAR — Gjykata Themelore e Gostivarit dënoi me pesë vjet burg ish-zyrtarin e policisë Ardijan Pinjolli, 38 vjeç nga Kërçova, për pjesëmarrjen në grabitjen spektakolare të artarisë në Gostivar, në tetor të vitit të kaluar. Sipas gjykatës, Pinjolli e ktheu makinën zyrtare “Chevrolet Spark” në mjet ndihmës për grabitësit e maskuar, duke çaktivizuar radion e policisë.
Ai u hapi rrugë automjeteve “BMW X5” dhe “Sharan” të grabitësve dhe u arrestua bashkë me disa pjesëtarë të tjerë të policisë së Kërçovës, dy javë pas grabitjes. Mbrojtja e tij thotë se gjykata nuk mori parasysh dëshmi që vërtetojnë pafajësinë e të dënuarit, ndërsa Avokati i Popullit ka evidentuar rrethana që ngrenë dyshime serioze për respektimin e standardeve të një procesi të rregullt e të drejtë.
Më parë, gjykata kishte dënuar me tre vjet e gjysmë burg një pjesëtar tjetër të policisë së Kërçovës, i cili e kishte pranuar fajin. Grabitja ndodhi në tetor të vitit të kaluar, kur persona të maskuar e të armatosur bllokuan rrugën para artarisë në Gostivar dhe morën 18 kilogramë ar, me vlerë rreth 1.8 milionë euro.
Burim: Alsat-M
— Redaksia ZHURMA