Pse u vërshojnë rrugët në Tearcë pas reshjeve të dendura?

TEARCË — Reshjet e dendura të shiut kanë shkaktuar vërshime të rëndësishme në Komunën e Tearcës, veçanërisht në fshatin Nerasht, ku banorët u përballën me dëme të mëdha. Një mur anash shtëpisë së një banori u shemb, ndërsa uji u mbështet drejtpërsëdrejti në muret e shtëpisë, duke rrezikuar stabilitetin e saj.

Banori i prekur deklaroi se fatkeqësisht uji erdhi nga kanalet e mbyllura të ujitjes, të cilat ishin bllokuar qëllimisht nga vetë banorët për të zgjeruar rrugët. "E shihni edhe vetë, fati i madh ka qenë që nuk e ka rrëzuar edhe shtëpinë. Dëmet mund të shihen që janë bërë," tha ai, duke shtuar se duhet të ndërtohet një mur më i fortë për të parandaluar ngjarje të ngjashme në të ardhmen.

Kryetari i Komunës së Tearcës, Daut Memishi, konfirmoi se nuk ka pasur denoncime zyrtare për dëme, por theksoi se problemet lindin nga vetë banorët, të cilët kanë mbyllur kanalet atmosferike. "Në disa fshatra i kanë mbyllur me arsyetimin që rrugët të jenë më të gjera, por kur ka reshje të mëdha, ato nuk janë në gjendje ta përballojnë ujin," shpjegoi Memishi.

Ndërkohë, në Tetovë situata mbeti nën kontroll, pa dëme materiale të rëndësishme. Ndërmarrja Publike Komunale "Sharri" deklaroi se pastrimi i vazhdueshëm i rrjetit të kanalizimit gjatë dy viteve të fundit ka dhënë rezultate pozitive. "Vazhdojmë që t’i pastrojmë dhe t’i lajmë gypat kryesorë, që kur të ketë reshje të mëdha të mos ndeshemi në probleme," tha Valon Zeqiri, përfaqësues i ndërmarrjes.

Megjithatë, nënkalimet në lagjen Dardania vazhdojnë të jenë pika kritike. Falë ndërhyrjes së shpejtë të njësisë së zjarrfikësve, uji i grumbulluar u tërhoq dhe nënkalimet u bënë të kalueshme për qytetarët. Kjo tregon se menaxhimi i shpejtë i situatës mund të parandalojë pasoja më të rënda.

Burim: TV21
— Redaksia ZHURMA