Peja formalizon partneritetin kulturor me Arbëreshët e Italisë
Delegacioni italian promovoi në Sheshin "Skënderbej" zanatet, veshjen tradicionale dhe gatimin "Dromësat".
PEJA — Komuna e Pejës ka formalizuar një partneritet ndërkombëtar bashkëpunimi me organizatën italiane Fili Meridiani APS, me fokus në kulturë, turizëm, trashëgimi dhe promovimin e identitetit të përbashkët me komunitetet arbëreshe.
Bashkëpunimi është rezultat i një dialogu të nisur në vitin 2025, kur Blerta Harxhi-Begolli, eksperte në zhvillimin lokal e bashkëpunim ndërkombëtar, mori pjesë në Festivalin Dixhital Arbëria në Pallagorio. Takimi institucional u zhvillua në Komunën e Pejës, në prani të këshilltares për Kulturë, Xhenet Syka, dhe stafit të administratës komunale.
Në Sheshin "Skënderbej", delegacioni i Fili Meridiani promovoi zanatet, traditat popullore dhe turizmin lokal, duke prezantuar Arbërinë e Krotones dhe fshatin Pallagorio. Prezantimi i gatimit tradicional arbëresh "Dromësat" u bë nga Raffaella Bossio dhe Stefania Demasi, ndërsa Maria Luisa Greco prezantoi veshjen tradicionale dhe këngëtari arbëresh Peppino Siciliani performoi këngë në gjuhën arbëreshe.
Delegacioni vizitoi gjithashtu Grykën e Rugovës dhe pika të tjera historike, kulturore e natyrore me potencial turistik. Sipas njoftimit, partneriteti përbën një hap të ri në bashkëpunimin ndërkombëtar të Fili Meridiani dhe synon projekte të qëndrueshme në kulturë, turizëm dhe zhvillim territorial.
Burim: Telegrafi
— Redaksia ZHURMA
