Premiera e dokumentarëve të Vranin Gecajt sjell historinë e Krajës

Historia, trashëgimia dhe kujtesa historike e trevës së Krajës janë sjellë në vëmendje përmes premierës së dy dokumentarëve me titull „Kraja e Shkodrës“ dhe „Konti i Ljarës“. Veprat janë realizuar nga autori dhe regjisori Vranin Gecaj dhe u shfaqën në Galerinë e Qendrës për Kulturë në Ulqin. Dokumentari i dytë trajton historinë e familjes fisnike Junkaj, e cila sipas autorit ka ruajtur titullin e kontit për 746 vjet, ndërsa përmes dëshmive theksohen lidhjet e hershme kulturore dhe historike të Krajës me Shkodrën.

Në realizimin e këtij projekti ka kontribuar edhe profesor Hajrullah Koliqi, i cili shërben si protagonist dhe folës kryesor në dokumentarin për Krajën, duke shpalosur veçoritë historike dhe identitare të kësaj treve. Regjisori Gecaj tregoi se ideja për filmat lindi nga lidhjet e tij familjare me familjen Junkaj dhe se synon ta shndërrojë nismën në një trilogji që përfshin gjithashtu arbëneshët e Zarës me prejardhje nga Shestani. Gjatë aktivitetit, Këshilli Kombëtar i Shqiptarëve në Malin e Zi i ndau regjisorit Gecaj një mirënjohje për kontributin e veçantë në dokumentimin dhe promovimin e trashëgimisë kulturore, e cila iu dorëzua nga kryetari Faik Nika.