Përurohet në Ulqin dynumërshi i revistës vjetore të kulturës “Dija”
Në Bibliotekën e Qytetit në Ulqin u bë përurimi i dynumërshit 19-20 të revistës vjetore për shkencë, art dhe kulturë “Dija”.
Redaksia ZHURMA · · 2 min lexim
Biblioteka e Qytetit në Ulqin ka qenë nikoqire e përurimit të dynumërshit 19-20 të revistës vjetore për shkencë, art dhe kulturë “Dija”, e cila përfaqëson një botim të Bashkimit të Krijuesve Shqiptarë në Mal të Zi. Veprimtarinë e drejtoi udhëheqësja e Bibliotekës, Ardita Rama, e cila vlerësoi bashkëpunimin e ndërsjellë ndërmjet institucioneve të librit dhe botimeve kulturore. Ajo theksoi se biblioteka shërben si vatër e dijes dhe hapësirë e dialogut kulturor.
Kryetari i Bashkimit të Krijuesve Shqiptarë në Mal të Zi, prim. dr. Gani Karamanaga, kujtoi se numri i parë i kësaj reviste u botua në vitin 2003 dhe vlerësoi kontributin e dhënë ndër vite nga personalitetet e fushës, përfshirë Gazmend Çitakun dhe Hajro Ulqinakun. Ndërkaq, kryeredaktori Gazmend Çitaku theksoi rolin e rëndësishëm që luajnë periodikët e specializuar në mbrojtjen dhe zhvillimin e gjuhës, traditës dhe trashëgimisë kulturore.
Sami Flamuri bëri prezantimin e përmbajtjes së numrit të ri, i cili përmban 223 faqe me poezi, prozë, ese, punime historike e gjeografike, si dhe studime shkencore. Në këtë botim përfshihen autorë vendorë dhe ndërkombëtarë, bashkë me studime kushtuar trashëgimisë së Ulqinit dhe trevave të tjera. Ngjarja mblodhi bashkë krijues, studiues dhe gazetarë, ndërsa shkrimtari Neki Lulaj përshëndeti takimin duke vlerësuar bashkëpunimin ndërmjet krijuesve shqiptarë.
