Parku Arkeologjik i Apolonisë shpallet pasuri kulturore e paluajtshme
Si do të mbrohet e administrohet Apolonia me planin e ri që ka miratuar sot Këshilli i Ministrave?
TIRANË — Këshilli i Ministrave ka miratuar sot vendimin për deklarimin e Parkut Arkeologjik Apoloni si "pasuri kulturore e paluajtshme". Vendimi përcakton kufirin, zonifikimin dhe planin për ruajtjen, mbrojtjen dhe administrimin e njërit prej siteve arkeologjike më të rëndësishme të vendit.
Statusi i ri i jepet parkut në përputhje me hartën e zonifikimit dhe koordinatat e Kornizës Referuese Gjeodezike Shqiptare (KRGJSH), të cilat janë pjesë përbërëse e aktit. Autoriteti Shtetëror për Informacionin Gjeohapësinor ngarkohet për publikimin e hartës në Gjeoportalin Kombëtar, ndërsa Agjencia Shtetërore e Kadastrës do të kryejë regjistrimin e vendimit sipas legjislacionit në fuqi.
Zbatimi i vendimit u ngarkohet Ministrisë së Turizmit, Kulturës dhe Sportit, Njësisë së Administrimit dhe Koordinimit të Parkut Arkeologjik Apoloni, si dhe Bashkisë Fier. Qëllimi i shpallur është forcimi i mbrojtjes së trashëgimisë kulturore dhe përmirësimi i menaxhimit të sitit. Vendimi hyn në fuqi pas botimit në Fletoren Zyrtare.
Burim: ATSH
— Redaksia ZHURMA
