OSHEE nis zëvendësimin e linjave elektrike në Kavajë
Taulant Balla inspektoi punimet më 31 korrik dhe kërkoi angazhim maksimal gjatë sezonit turistik për të shmangur ndërprerjet e energjisë.
KAVAJË — OSHEE ka nisur investimin për modernizimin e rrjetit elektrik në bashkinë e Kavajës, duke zëvendësuar linjat ekzistuese me sistemin e ri kabllor ABC. Ky projekt i ri synon të përmirësojë cilësinë e shërbimit dhe të garantojë një furnizim më të qëndrueshëm e të pandërprerë me energji elektrike për të gjithë banorët.
Drejtuesi politik i Partisë Socialiste për qarkun e Tiranës, Taulant Balla, vëzhgoi më 31 korrik nga afër punimet që po kryhen në fshatin Synej. Ky investim do të shtrihet gjithashtu në fshatin Qerret dhe në të gjitha lagjet e qytetit, me synim përmirësimin e rrjetit për bizneset dhe banorët.
Gjatë inspektimit, Balla kërkoi angazhim maksimal nga punonjësit, veçanërisht gjatë sezonit turistik për t'iu përgjigjur në kohë çdo problematike. Ai nënvizoi se modernizimi i sistemit do të reduktojë ndërprerjet, do të rrisë efikasitetin dhe do të rrisë cilësinë e shërbimit për banorët dhe vizitorët.
Burim: ATSH
— Redaksia ZHURMA