Banka Botërore: Hani i Hotit kryeson eksportet kufitare, Kakavija me importe më të larta

Hani i Hotit mban vlerën më të lartë të eksporteve për kompanitë që importojnë dhe eksportojnë përmes pikave kufitare tokësore të Shqipërisë, ndërsa Kakavija kryeson sa i përket volumeve të importeve. Përfundimet vijnë nga raporti i Bankës Botërore i publikuar në tetor 2026, i cili analizon tregtinë kufitare përgjatë periudhës 2017–2023.

Sipas analizës së publikuar nga Banka Botërore nën titullin "Lidhja e bizneseve me tregjet: Të dhëna nga portet dhe pikat kufitare për qëndrueshmërinë e eksporteve në Shqipëri", lëvizja tregtare përmes pikave tokësore paraqet dallime të dukshme sa i përket numrit të operatoreve tregtarë dhe volumit të mallrave.

Raporti i Bankës Botërore bën të ditur se kompanitë dypalëshe, që kryejnë njëkohësisht eksporte dhe importe, kanë realizuar në Hanin e Hotit një mesatare vjetore eksportesh prej 78.55 milionë dollarësh. Kapshtica renditet pas saj me 56.85 milionë dollarë, ndërsa Kakavija ka regjistruar 51.94 milionë dollarë dhe Bllada 4.18 milionë dollarë. Në Hanin e Hotit kalojnë mesatarisht 233 subjekte aktive në vit në këtë kategori, përkundrejt 181 kompanive në Kakavijë dhe 163 në Kapshticë. Megjithatë, Kapshtica mban me mesatarisht 352,500 dollarë në vit vlerën më të lartë të eksporteve për secilën kompani, e ndjekur nga Hani i Hotit me 334,800 dollarë dhe Kakavija me 284,600 dollarë.

Në lidhje me importet e bizneseve dypalëshe, Kakavija kryeson renditjen vjetore me një vlerë mesatare prej 164.77 milionë dollarësh, e ndjekur nga Kapshtica me 127.40 milionë dollarë dhe Hani i Hotit me 80.88 milionë dollarë. Sa u përket bizneseve që zhvillojnë vetëm aktivitet importues, Hani i Hotit mban numrin më të madh të subjekteve me mesatarisht 1,450 në vit, por Kapshtica kryeson me vlerën e importeve prej 55.46 milionë dollarësh, ndaj 53.74 milionë dollarëve të regjistruara në Kakavijë. Ndërkohë, Kakavija regjistron vlerën më të lartë të importeve për çdo biznes të kësaj kategorie me 91,100 dollarë në vit, e ndjekur nga Kapshtica me rreth 82 mijë dollarë. Në tërësi, përmes katër pikave kufitare realizohen çdo vit 378.7 milionë dollarë importe dhe 191.5 milionë dollarë eksporte nga kompanitë me profil të dyfishtë.

Në studimin e saj, Banka Botërore nërmend edhe diversitetin e produkteve që tregtohen, ku në krahun e importeve të kompanive me veprimtari të dyfishtë Kapshtica numëron mesatarisht 1,050 kategori produktesh në vit, ndërsa Kakavija 1,036 kategori sipas klasifikimit doganor gjashtëshifror.