Struktura e shpenzimeve nxjerr në pah ndryshimet mes Shqipërisë dhe BE-së
Konsumi familjar në Shqipëri ndryshon ndjeshëm nga ai në Bashkimin Europian, ku pjesa më e madhe e buxhetit shkon për ushqim.
Redaksia ZHURMA · · 2 min lexim
Struktura e konsumit familjar në Shqipëri mbetet larg asaj të vendeve të Bashkimit Europian, duke reflektuar nivele të ndryshme mirëqenieje. Sipas të dhënave të INSTAT dhe Eurostat, në vitin 2025 familjet shqiptare shpenzuan 39.8% të buxhetit të tyre për ushqime dhe pije joalkoolike, ndërsa në Bashkimin Europian kjo kategori zinte mesatarisht 13.2% të konsumit. Në ekonomi kjo marrëdhënie shpjegohet përmes ligjit të Engel-it, ku me rritjen e të ardhurave pesha e ushqimeve zvogëlohet, por në Shqipëri kjo nuk ndodh njësoj pasi mbeten shpenzime të larta për mbijetesë.
Diferenca të theksuara shfaqen edhe te kategoria e kohës së lirë, ku argëtimi dhe kultura zënë vetëm 2.8% të buxhetit familjar në Shqipëri, krahasuar me 7.7% në Bashkimin Europian. Për sa i përket transportit, familjet shqiptare harxhojnë 7.2% të buxhetit kundrejt 12.5% në Bashkimin Europian, ndërsa restorantet dhe akomodimi zënë 7.5% në vend kundrejt 9.5% në totalin europian. Shpenzimet për banesën, ujin, energjinë dhe lëndët djegëse arrijnë në 23.8% në Bashkimin Europian, krahasuar me 9.7% në Shqipëri, ndonëse Eurostat përfshin gjithashtu qiranë e imputuar për banesat në pronësi.
Ndërkohë, për veshje dhe këpucë, familjet në vend përdorin 5% të buxhetit kundrejt 4.1% në Bashkimin Europian, kurse pijet alkoolike dhe duhani zënë 4.3% përkundrejt 3.6%. Për mobilimin dhe pajisjet shtëpiake shqiptarët shpenzojnë 6.6%, ndërsa europianët 4.8%. Në fushën e arsimit, shpenzimet në Shqipëri llogariten 3.3% të konsumit familjar kundrejt 0.9% në Bashkimin Europian, ndërsa për shëndetin raporti është 3.4% në vend kundrejt 4.5% në Bashkimin Europian. Së fundmi, shpenzimet për komunikim paraqiten më të përafërta, me 3.7% në Shqipëri dhe 3.3% në Bashkimin Europian.
