Nisin punimet 85 milionë euro për ujërat e ndotura në Durrës
Ministri Enea Karakaçi njoftoi nisjen e projektit për trajtimin e ujërave të ndotura në Durrës, mbështetur me grant nga Bashkimi Evropian.
Redaksia ZHURMA · · 1 min lexim
DURRËS — Kanë nisur punimet për modernizimin e sistemit të trajtimit të ujërave të ndotura dhe rehabilitimin e rrjetit të kanalizimeve në Durrës. Ministri i Energjisë dhe Infrastrukturës, Enea Karakaçi, bëri me dije se ky projekt mbështetet nga një grant prej rreth 85 milionë eurosh nga Bashkimi Evropian.
Sipas ministrit, ky është granti më i madh i dhënë nga Bashkimi Evropian për një projekt në Shqipëri. Financimi do të plotësohet edhe nga Agjencia Franceze për Zhvillim për të mundësuar modernizimin dhe zgjerimin e impiantit.
Faza e dytë e projektit parashikon zgjerimin e rrjetit të kanalizimeve në Shkozet, Porto Romano dhe Spitallë. Karakaçi e cilësoi këtë investim si dëshmi të qartë të përfitimeve nga procesi i integrimit dhe afrimit të Shqipërisë me Bashkimin Evropian.
