Ndërtimi zë 10% të ekonomisë kosovare — vetëm Shqipëria e kalon në Evropë

PRISHTINË — Ndërtimi zë rreth 10% të vlerës së shtuar bruto në ekonominë e Kosovës, pesha e dytë më e lartë në Ballkanin Perëndimor pas Shqipërisë, por edhe në nivel europian, sipas krahasimit të të dhënave të Eurostatit për vitin 2024, të përpunuara nga Monitor.

Industria zë vend edhe më të madh në ekonominë kosovare — 22.8% të vlerës së shtuar bruto, një nga nivelet më të larta në Ballkanin Perëndimor, krahasuar me vetëm 12% që ka Shqipëria.

Tregtia, transporti, akomodimi dhe shërbimi ushqimor së bashku përbëjnë rreth një të katërtën e ekonomisë vendase, ndërsa bujqësia mbetet relativisht e rëndësishme, me 9.3% të vlerës së shtuar bruto.

Në krahasim, informacioni, komunikimi, financat dhe shërbimet profesionale mbeten sektorë më pak të zhvilluar në Kosovë sesa mesatarja rajonale dhe ajo europiane — strukturë e ngjashme me Shqipërinë, përveç peshës shumë më të lartë që zë industria.

Shqipëria mbetet vendi me peshën më të lartë të ndërtimit në tërë Europën, me 13.8% të vlerës së shtuar bruto — më shumë se dyfishi i mesatares së Bashkimit Europian, që qëndron në 5.5%.

Ndërtimi në Shqipëri ka shërbyer edhe si kanal për hyrjen e parave informale në vend, sipas hetimeve të fundit të SPAK-ut, duke fryrë çmimet e pasurive të paluajtshme dhe duke i bërë ato më pak të përballueshme për vendasit.

Në pjesën tjetër të rajonit, ndërtimi zë 7.2% të ekonomisë në Maqedoninë e Veriut, 5.9% në Serbi, 5.6% në Bosnjë-Hercegovinë dhe rreth 5% në Malin e Zi — të gjitha nën peshën që ka sektori në Kosovë.

Serbia dallohet nga pjesa tjetër e rajonit për peshën e sektorit të informacionit dhe komunikimit, që gjeneron rreth 10% të vlerës së shtuar bruto — pothuajse katërfishi i nivelit në Kosovë, që qëndron vetëm në 2.5%. Mesatarja e Bashkimit Europian për këtë aktivitet qëndron rreth 5%, çka e lë Kosovën nën nivelin europian.

Burim: Ekonomia Online
— Redaksia ZHURMA