Qeveria miraton 118 projekte me 14.8 miliardë euro, përfshi Expo Albania për 50.3 mln euro

TIRANË — Qeveria shqiptare ka miratuar listën e re të 118 projekteve prioritare për periudhën 2027-2029, me një faturë totale financiare që arrin në 14.8 miliardë euro. Vendimi, i cili është botuar tashmë në Fletoren Zyrtare, ndan investimet sipas fazave të maturimit, ku një pjesë e konsiderueshme prej 56 projektesh me vlerë 5.64 miliardë euro ndodhen në fazë zbatimi ose janë tashmë të maturuara.

Në këtë listë strategjike përfshihet për herë të parë projekti për ndërtimin e “EXPO Albania”, një qendër e re për panaire, konferenca dhe ekspozita arti, e cila do të kushtojë 50.3 milionë euro. Ky investim, i projektuar nga arkitekti amerikan Steven Holl në vitin 2024, parashikohet të ndërtohet në ish-zonën ushtarake të Farkës në Tiranë, në një sipërfaqe prej 6 hektarësh që do të përfshijë gjithashtu hotele.

Ndërkohë, 5.97 miliardë euro të tjera i takojnë projekteve të klasifikuara si ‘pjesërisht të maturuara’, ndërsa 31 projekte me vlerë 3.27 miliardë euro mbeten ende në fazë idesh pa zhvillim të mëtejshëm. Në mesin e këtyre të fundit përfshihen vënia në punë e TEC-it të Vlorës dhe linja e re e interkoneksionit nënujor Vlorë-Brindisi.

Lista e re përfshin gjithashtu dy investime të reja për menaxhimin e mbetjeve të financuara nga buxheti i shtetit, me rreth 25 milionë euro për zonën jugore Vlorë-Gjirokastër dhe 18 milionë euro për Kukësin. Po ashtu, është shtuar investimi prej 109.2 milionë eurosh për infrastrukturën e internetit të shpejtë në tetë qarqe.

Nga vendimi i qeverisë bie në sy se projekte të rëndësishme si linja hekurudhore Durrës-Prishtinë me vlerë 750 milionë euro, ndërtimi i Skavicës apo Aeroporti i Jugut vijojnë të mbeten ende pa siguruar një financim konkret, duke figuruar kryesisht në letër.

Burim: Shqiptarja
— Redaksia ZHURMA