Ndalet rryma në Kuvend, ndërpritet seanca për buxhetin
Energjia elektrike është ndërprerë në Kuvendin e Kosovës gjatë diskutimeve për buxhetin, duke lënë deputetët në terr.
Redaksia ZHURMA · · Përditësuar · 1 min lexim
Seanca e Kuvendit të Kosovës e cila po mbahej në orët e mbrëmjes është ndërprerë si pasojë e ndaljes së energjisë elektrike. Puna e legjislativit kishte filluar që në orën 12:00 me pyetje parlamentare dhe deklarime jashtë rendit të ditës, për të vazhduar më pas me shqyrtimin e ndarjeve buxhetore. Pamjet nga salla ku shihen deputetët në terr u publikuan nga deputeti Ermal Sadiku.
Deputeti i AAK-së, Besnik Tahiri, ka shkruajtur se «Rryma u ndal, sistemi jashtë funksionit, ende duke folur për buxhet». Seanca ku po diskutohej për buxhetin e vitit 2027 mbeti e ndërprerë pa pasur ende informacione se kur do të ketë rinisje të punimeve.