Kush është Medina Ali, gruaja e parë shqiptare në mundjen profesionale?

LOS ANXHELOS — Medina Ali hyri për herë të parë në ring me emrin artistik Xena Phoenix, duke u bërë gruaja e parë shqiptare në mundjen profesionale. E lindur dhe e rritur në Los Anxhelos, ajo është vajza e dy emigrantëve shqiptarë nga Mali i Zi që u vendosën në SHBA gjatë viteve '90.

"Duke parë sa shumë kanë punuar prindërit e mi për jetën që kanë ndërtuar për familjen tonë, u frymëzova që në moshë të vogël", ka thënë ajo për "Atlantiku".

Rruga drejt ringut nuk ishte e planifikuar. Gjatë studimeve për film, ajo iu bashkua një palestre MMA vetëm për të qëndruar aktive. E frymëzuar nga Ronda Rousey, provoi boksin, pastaj Muay Thai, më vonë Brazilian Jiu-Jitsu. "Kur zbulova jiu-jitsun, ishte hera e parë në jetën time që u ndjeva kaq e lidhur me diçka."

"Ishte stërvitja më e vështirë që kam përjetuar ndonjëherë", kujton ajo për provën e parë në mundje. Për një kohë u rikthye te jiu-jitsu, duke menduar se mundja ishte tepër e vështirë.

Gjithçka ndryshoi në fillim të vitit 2024, kur organizata WOW – Women of Wrestling e ftoi në një provë. "Kur hyra atë ditë aty, më ofruan një kontratë për t'u trajnuar si mundëse profesioniste."

"Nuk kam qenë kurrë më nervoze në jetën time, por asnjëherë më krenare për atë që po bëja dhe për atë që po përfaqësoja", thotë ajo për debutimin. "Të përfaqësoja shqiptarët në atë ring do të thoshte gjithçka për mua."

Mesazhi i saj për të rinjtë shqiptarë mbetet i thjeshtë: "Nëse keni një ëndërr dhe një pasion në zemrën tuaj, jepini vetes leje të dilni përpara dhe ta ndiqni." Ajo tani dëshmon se talenti dhe këmbëngulja mund t'i çojnë shqiptarët në majat e çdo fushe, sado e pazakontë të duket ajo.

Burim: Telegrafi, https://telegrafi.com/nje-shqiptare-ne-boten-e-mundjes-profesionale-historia-frymezuese-e-medina-ali/
— Redaksia ZHURMA