Manzambi shënon e asiston në fitoren 2:1 të Zvicrës

VANKUVER — Johan Manzambi ia doli sërish. Mesfushori 20-vjeçar i Zvicrës la gjurmën e tij edhe një herë në ndeshjen kundër Kanadasë, me një gol dhe një asistim, dhe u shpall për të dytën herë radhazi “Lojtari i Ndeshjes” nga FIFA në fitoren 2:1 të helvetëve.

“Johan ka qenë në një formë të jashtëzakonshme gjatë një viti”, tha përzgjedhësi Murat Yakin, i cili e kishte mbajtur sekret rolin e Manzambit para ndeshjes. Vetëm një vit më parë e shihte si lojtar krahu; tani ai zë qendrën e fazës ofensive.

“Ai ndihet shumë rehat si numër 10, pasi ka shumë liri në atë pozitë. I sheh boshllëqet, ka një vrull sulmues të jashtëzakonshëm dhe shpejtësi në përfundimin e aksioneve”, shtoi Yakin, duke theksuar se talenti i ri i Freiburgut ndihmon edhe në mbrojtje.

Kur shënon, 20-vjeçari feston sikur mban një mango në duar, por arsyen nuk e zbulon: “Kjo mbetet mes meje dhe shokëve të mi”. Para katër vjetësh, kujton ai, e mbështeste Zvicrën nga shtëpia; sot luan vetë në Kupën e Botës. “Shumë, shumë i mrekullueshëm për mua.”

Çfarë e mban me këmbë në tokë? “Familja ime”, thotë lojtari me origjinë nga Gjeneva, që përmend edhe shokët e ekipit. Zëvendëskapiteni Manuel Akanji e quan “shumë kreativ”, të aftë të bëjë diçka të veçantë nga situata që duken si asgjë.

Edhe portieri i Zvicrës, Gregor Kobel, parashikon për të “një karrierë fantastike” nëse vazhdon kështu. Kobel e sheh të qetë e të përqendruar, dhe pranon me të qeshur se do ta donte te Borussia Dortmund: “Por tani është bërë pak më i shtrenjtë, kështu që duhet të shohim se çfarë është e mundur.”

Statistikat habisin: vetëm Kylian Mbappe dhe Thomas Müller këtë shekull janë përfshirë në katër a më shumë gola në një Kupë Bote nën moshën 21-vjeçare. Manzambi barazoi edhe rekordin e Xherdan Shaqirit — tre gola, Brazil 2014 — dhe synon ta kalojë. Yakin lë të kuptohet se e meriton një vend në formacionin titullar në 1/32-at.

Burim: Koha.net
— Redaksia ZHURMA