Pse mblodhi Haraçina gjeneralët e UÇK-së dhe diasporën shqiptare?

HARAÇINË — Dy data të rëndësishme bashkuan shqiptarët e Maqedonisë dhe diasporës më 24 qershor: 30-vjetori i themelimit të Komunës së Haraçinës dhe 25-vjetori i Betejës së Haraçinës. Me ftesën e z. Ragmi Emini — Komandant Musteqja — aktiviteti u zhvillua në Haraçinën e Malësisë së Shkupit, ku mori pjesë edhe shoqata diasporike "Lidhja Është Gjallë".

Në ceremoninë solemne morën pjesë familjarë të rilindësve Hasan Prishtina e Shaban Polluzha, historiani Prof. Zahir Kastrati dhe pasardhësi i Azem Bejtë Galicës, si dhe Ambasadori i Shqipërisë SHTZ Ditjon Mejdani, i cili mbajti fjalim mbresëlënës. Gjeneralët e UÇK-së Xhevahir Geci e Hajrush Kurti ishin ndër protagonistët e ngjarjes.

Një moment i veçantë ishte dekorimi i shtëpisë së Komandant Musteqes me pllakë lavdie nga OVL e UÇK-së, si shtëpi bazë e UÇK-së. Programi kulturor kulmoi me performancën e Ismet Bexhetit, i cili prezantoi një këngë me tekst të çlirimtarit Rexhep Selimi, kushtuar veteranëve të UÇK-së.

Gjeneral Xhevahir Geci vlerësoi lart angazhimin e Dr. Mehmet Prishtinës për bashkimin shpirtëror të familjeve të Rilindjes Kombëtare Shqiptare — nga Lidhja e 1912-ës deri sot — duke theksuar vetëfinancimin e tij dhe rolin e Fondacionit "Hasan Prishtina". Komuna e Haraçinës ndau mirënjohje të veçantë për Prishtinën.

Në fjalimin e tij, Dr. Prishtina u bëri thirrje shqiptarëve të lënë mënjanë ndasitë dhe t'i hapin rrugë brezave të rinj. Ai i dhuroi kryetarit të komunës Daut Beqiraj librin e tij të fundit mbi lëvizjen revolucionare shqiptare dhe maqedonase në rrjetet e diplomacisë sovjetike 1922–1928, si dhe "Lulëkuqen e Kosovës".

Burim: Illyria (NY, SHBA)
— Redaksia ZHURMA