Sa këngë popullore sjell libri i ri i Arben Demirit?

SHKUP — Kompozitori dhe fizarmonicisti Arben Demiri ka shënuar një moment të rëndësishëm në karrierën e tij duke nxjerrë në botim librin e tretë, të titulluar “Fizarmonika magjike në këngët e një udhëtimi muzikor”, duke pasuruar fondin tonë të pasur artistik.

Ky botim i veçantë vjen në një vit plot domethënie për autorin, pasi shënon jubileun e 40-vjetorit të veprimtarisë së tij të pandërprerë si muzikant. Demiri u shpreh se ky libër është një dëshmi e përkushtimit dhe përvojës së grumbulluar gjatë këtyre katër dekadave.

Libri sjell një përmbledhje të strukturuar me 31 këngë popullore shqipe, të cilat janë përzgjedhur me kujdes dhe janë transkriptuar posaçërisht për këtë instrument. Përtej vlerës artistike, botimi luan një rol profesional mbi mënyrën e saktë të interpretimit të këtyre këngëve të bukura shqipe.

Sipas Demirit, këngët popullore janë shënuar dhe melografuar përmes një metodologjie krejtësisht të re e unike. Gjatë konsultimeve me kolegë nga Kosova dhe Shqipëria, atij iu konfirmua se ky lloj i të shënuarit të këngëve nuk është zbatuar ende në literaturën e këtij instrumenti.

Veçantia e librit qëndron në paraqitjen ekzakte të ornamenteve dhe zbukurimeve karakteristike të folklorit tonë. Pjesa më e madhe e tyre janë shënuar me tinguj zbukurues të lidhur me notën kryesore përmes një harku të vogël, duke ofruar lexim shumë më të qartë.

Ky botim i ri synon të frymëzojë instrumentistët e rinj shqiptarë që të kultivojnë me pasion traditat tona. Autori shpreson që ky libër të ndihmojë në ruajtjen e trashëgimisë, në një kohë kur flitet pse të rinjtë në rajon kërkojnë të sotmen dhe të ardhmen përmes artit.

Së fundmi, fizharmonicisti planifikon realizimin e një albumi muzikor instrumental me fizarmonikë, ku do të përfshijë këngë popullore të përpunuara në një stil më ndryshe. Ky projekt dëshmon se ruajtja e vlerave tona kombëtare kërkon guxim artistik për të mbijetuar dhe për t'u kultivuar më tej.

Burim: Portalb
— Redaksia ZHURMA