Kuvendi i Rahovecit miraton lokacionin për qendrën e re mjekësore në Fortesë

RAHOVEC — Kuvendi Komunal i Rahovecit ka miratuar caktimin e lokacionit për ndërtimin e Qendrës së Mjekësisë Familjare në Fortesë. Ky vendim u mor me 20 vota për gjatë seancës së shtatë të këtij kuvendi, ku u shqyrtuan edhe disa pika për menaxhimin komunal dhe financat publike.

Përveç pikës për qendrën shëndetësore, asambleistët miratuan ndryshim-plotësimin e Rregullores për menaxhimin e mbeturinave në territorin e kësaj komune. Kjo rregullore synon të rregullojë menaxhimin e mbetjeve, duke përditësuar normat e vendosura në rregulloren e marsit të vitit 2023.

Në këtë seancë, asambleisti Jusuf Dermala ngriti çështjen e pastrimit të mbeturinave tek hyrjet e Urës së Hamocit. Ai kritikoi ashpër qasjen e Drejtorisë së Shërbimeve Publike, duke thënë se punëtorët dhe makineritë po i mbulojnë mbeturinat me dhe në vend që t'i pastrojnë ato tërësisht nga ky lokacion.

Dermala theksoi se kjo qasje e mbulimit është e gabuar dhe nuk e zgjidh ndotjen në atë pjesë. Ai kërkoi angazhim për pastrimin e plotë, duke vënë në dukje se mbeturinat duhet të largohen fizikisht e jo të fshihen nën shtresa dheu.

Nga ana tjetër, drejtori për Financa, Arif Limani, prezantoi Raportin e Auditimit për Pasqyrat Financiare Vjetore të Komunës për vitin 2025. Limani njoftoi se raporti përfundon me opinion të kualifikuar, si rezultat i keqklasifikimeve me pagesën e kontratës kolektive në vlerë prej 2 milionë eurosh.

Sipas Limanit, ky raport përmban shtatë rekomandime, pesë prej të cilave janë të përsëritura, ndërsa dy janë të reja. Ai shtoi se dy rekomandime të vitit të kaluar janë zbatuar tashmë, ndërsa të tjerat mbeten ende në proces të zbatimit nga komuna.

Burim: Ekonomia Online
— Redaksia ZHURMA