Mbledhja e Bordit Drejtues të PISA mbahet për herë të parë në Tiranë

TIRANË — Tirana mirëpret për herë të parë Mbledhjen e Bordit Drejtues të PISA, ku merr pjesë Drejtori për Edukimin dhe Aftësitë i OECD, Andreas Schleicher, së bashku me përfaqësues nga 91 vende. Ngjarja tre ditore përqendrohet te prioritetet e vlerësimit ndërkombëtar të nxënësve, ndërsa Ministrja e Arsimit, Mirela Kumbaro, përshëndeti ceremoninë e hapjes.

Studimi ndërkombëtar i organizuar nga OECD vlerëson aftësitë e 15-vjeçarëve në mbarë botën në lexim, shkencë dhe matematikë. Shqipëria regjistroi përmirësim të ndjeshëm në rezultatet e testit PISA 2025 krahasuar me vitin 2022. Sipas të dhënave të OECD, vendi shënoi një rritje prej 65 pikësh në matematikë, 59 pikësh në shkencë dhe 50 pikësh në lexim.

Gjatë takimeve, paneleve dhe tryezave të diskutimit, Ministrja e Arsimit, Mirela Kumbaro, përmendi punën e bërë për modernizimin e kurrikulave dhe moduleve trajnuese për mësuesit e nxënësit lidhur me përdorimin e qëndrueshëm të teknologjisë dhe inteligjencës artificiale. Ajo veçoi gjithashtu programin “Pas Shkolle” dhe lëvizjen kombëtare për lexim 2.0 si nisma që zhvillojnë gjykimin kritik, mendimin kreativ dhe kuriozitetin. Ajo vuri nëdukje edhe sfidat në kryeqytet, duke theksuar se burokracia arsimore duhet të përshtatet me nevojat e të rinjve, ndërsa siguria dhe e drejta e tyre për të mësuar mbeten parësore.

Evoluimi i arsimit dhe teknologjisë mbetet në fokus të diskutimeve të delegacioneve gjatë takimeve të planifikuara për këtë ngjarje tre ditore.

«Janë pikërisht të rinjtë ata që na mbledhin sot, për të diskutuar mbi të ardhmen e arsimit dhe sfidat e reja që sjell një botë ku gjithçka ndryshon me një ritëm të jashtëzakonshëm. Teknologjia dhe veçanërisht inteligjenca artificiale po e ndryshojnë mënyrën se si jetojmë, mësojmë, punojmë dhe ndërveprojmë me njëri-tjetrin. Qasjet e reja që përpiqemi të ndërtojmë përmes analizave që bën edhe programi i PISA, na duhet të përballojnë jo thjesht të sotmen që ecën më shpejt se sa frymëmarrja jonë, por të na ndihmojnë të përgatisim fëmijët jo vetëm për botën që njohim ne, por për atë që ne nuk e njohim dhe fëmijët na e paraprijnë me aftësitë e tyre», u shpreh Kumbaro.

«Edhe Tirana, si shumë kryeqytete europiane, po kalon ditë jo të lehta me tensione dhe përplasje në hapësirën publike, ku kufiri midis ndërgjegjes sociale dhe adrenalinës së turmës, është më i hollë se një fije floku. Prandaj na duhet të përdorim të gjitha mjetet, për të kuptuar se çfarë duhet të ndryshojmë në qasjen tonë, edhe në burokracinë tonë arsimore, që lëviz shumë më ngadalë se sa adrenalina te nxënësit. Ama një parim na bashkon të gjithëve. Fëmijët dhe të rinjtë duhet të kenë hapësirën për të shprehur mendimet e tyre, për të bërë pyetje, për të kërkuar ndryshime dhe për të mos qenë dakord. Por siguria, mirëqenia dhe e drejta e tyre për të mësuar duhet të mbeten gjithmonë në qendër të përgjegjësisë sonë», tha ministrja.