Kush do ta financojë kompleksin e ri sportiv në Laç?

LAÇ — Presidenti i Federatës Shqiptare të Futbollit, Armand Duka, ka zhvilluar sot një takim me Kryetaren e Bashkisë Kurbin, Majlinda Cara. Diskutimi u përqendrua te zhvillimi i infrastrukturës sportive në qytetin e Laçit, duke synuar forcimin e bashkëpunimit institucional në shërbim të futbollit dhe komunitetit lokal.

Gjatë këtij takimi, palët ranë dakord të bashkëpunojnë për ndërtimin e një kompleksi modern sportiv në Laç. Ky investim strategjik do të realizohet në partneritet midis FSHF-së, Bashkisë Kurbin dhe KF Laçit, duke shënuar një hap të rëndësishëm për modernizimin e infrastrukturës në vend.

Komiteti Ekzekutiv i FSHF-së ka miratuar tashmë mbështetjen për këtë projekt. Marrëveshja e bashkëpunimit mes palëve përcakton angazhimin e përbashkët për realizimin e një prej investimeve më të rëndësishme infrastrukturore në rajonin e Kurbinit, duke krijuar kushte bashkëkohore për futbollin e kësaj zone.

Kompleksi i ri do të ndërtohet sipas standardeve moderne. Ai do të përfshijë dy fusha futbolli me bar artificial me përmasa standarde, një fushë me bar natyral me përmasa standarde, si dhe një fushë më të vogël, duke krijuar një qendër të plotë stërvitore.

Për financimin, FSHF do të kontribuojë me 50% të vlerës, Bashkia Kurbin me 30%, ndërsa KF Laçi me 20% duke përfshirë edhe vlerën e truallit të siguruar. Ky investim është planifikuar të realizohet në tri faza të njëpasnjëshme të punimeve.

Në fazën e parë do të ndërtohen fushat, rrethimi dhe rruga e kompleksit. Në fazat e tjera do të ndërtohen tribunat, dhomat e zhveshjes dhe një hotel. Ky kompleks do t'u shërbejë akademive të KF Laçit, ekipeve kombëtare dhe komunitetit.

Burim: Sportekspres
— Redaksia ZHURMA