Kurti: Shqiptarët e Luginës do të kenë mbështetje materiale dhe financiare

Kryeministri i vendit, Albin Kurti, ka deklaruar se Qeveria e Kosovës do të vijojë të mbështesë shqiptarët e Preshevës, Medvegjës dhe Bujanocit në nivel politik, si dhe përmes ndihmës materiale e financiare. Pas përfundimit të seancës së Kuvendit, Kurti ka vlerësuar bashkimin e subjekteve shqiptare në zgjedhjet e jashtëzakonshme që do të zhvillohen në Serbi, duke theksuar se shqiptarët do të garojnë përmes një liste të përbashkët të quajtur “Koalicioni Shqiptar”.

Kryeministri ka përmendur gjithashtu shifra lidhur me përfaqësimin e ulët të shqiptarëve në institucionet e Luginës, duke theksuar se gjatë dekadës së fundit nuk është punësuar asnjë polic i ri shqiptar, ndërsa në Spitalin e Vranjës vetëm dy mjekë janë shqiptarë nga më shumë se një mijë e treqind të punësuar. Më parë, Qeveria e Kosovës kishte trajtuar çështje të buxhetit dhe mbështetjes financiare për kategori të ndryshme institucionale.