Majlinda Dhuka: BE mbetet destinacioni strategjik dhe aspirata e vendit

Kryenegociatorja e Shqipërisë në procesin e integrimit europian, Majlinda Dhuka, ka reaguar pas protestave të fundit, duke bërë thirrje për dialog, respektim të institucioneve dhe ruajtje të vlerave europiane. Ajo theksoi se aspirata europiane mbetet destinacioni strategjik i vendit dhe se procesi i integrimit kërkon përgjegjshmëri, bashkëpunim dhe respekt për shtetin e së drejtës.

Sipas Dhukës, protestat dhe zëri i qytetarëve kërkojnë reflektim me përgjegjësi të lartë për ndërtimin e një Shqipërie ku institucionet respektohen dhe shteti i së drejtës është mbi çdo interes. Ajo nënvizoi rëndësinë e pjesëmarrjes qytetare dhe të drejtës për t'u shprehur, duke shtuar se vlerat europiane mbështeten te dialogu dhe respekti për ligjin.

«Bashkimi Europian është destinacioni ynë, familja europiane është përkatësia jonë çdo ditë, edhe sot», u shpreh ajo, duke shtuar se vendi ndodhet në një moment historik dhe më pranë se kurrë realizimit të objektivit për anëtarësim pas më shumë se tridhjetë vitesh.